16-пи ноябриъ «Дагъустан» РИА-йин пресс-конференцйир гъахру залиъ РД-йин жигьиларин ляхнариз лигру министр Камил Сяидов республикайин СМИ-йин вакиларихъди гюрюшмиш гъахьну. Дугъу жигьиларин наркотикариз аькси гьяракатнакан, 17-пиноябриъ ачмиш апIуз планламиш дапIнайи наркотикариз аькси слетдикан мялуматар тувнийи.
Камил Сяидовди къайд гъапIганси, жара регионарихь тевиган, Дагъустандиъ жигьиларин арайиъ алкоголизмдин, наркоманияйин, папрусар зигувалин месэлйир думукьан учIруди дийигънадар. Ихь жигьилар артухъси спортдиин машгъул ву, дурар уьмрин сагъу рякъюъди гъягъюра. Амма аьхиримжи вахтна интернетдин кюмекниинди наркотикар тарагъувал, наркотикар ишлетмиш апIувал артухъ дубхьна.
РД-йин жигьиларин ляхнариз лигру министерствойи наркотикариз аькси сабпи слет 2017-пи йисан кIули гъубхнийи. Къайд апIувал лазим вуки, Дагъустандин жигьиларин наркотикариз аькси гьяракатнан слет жигьиларин ва набалугъарин арайиъ наркотикарин профилактика гъабхурайи пишекрарихъди сигъ аьлакьайиъди гъабхури, магьа 5-пи раж ву.
«Серенжем онлайн форматдиъди кIули гъябгъиди, РД-йин жигьиларин ляхнариз лигру министерствойин социальный сетариъ трансляция хьибди. Наркотикар кIуру тIягъвнихъди женг гъабхуз учу вари жюрейин майднар ишлетмиш апIурача. Ич метлеб — наркотикар инсандин сагъламвалин пис душман вуйивал улупуб вуйич»,- гъапну министри.
Дугъу къайд гъапIганси, серенжемдиъ иштирак хьуз вари муниципалитетариз теклиф дапIна, асас фикир шагьрариз тувра, фицики наркотикар ва инсандиз чIуру тясир апIру дармнар шагьрариъ артухъди тарагъна.
«Слетдин дахилнаъди семинарар, ачухъ лекцйир гъахиди, жигьиларин ва мектебариъ урхурайидарин арайиъ наркоманияйин профилактика гъабхбан ужуб тажрубайикан ктибтру майднар ачмиш апIиди. Слетдиъ иштирак хьуз учуз 6 йислан 17 йис’ина яш айи бицIидариз методикайин пособие гьязур апIуз кюмек туву Ставропол крайин жигьиларин «Хядарин микI» яратмишарин союз» жямяаьтлугъ тешкилатдин кIулиъ айи Иван Скиперскийдиз, гьацира блогерариз, жямяаьтлугъ фикрарин регьбрариз теклиф дапIнача», — гъапну Камил Сяидовди.
Гъийин девриъ жигьиларин арайиъ наркоманияйихъди женг гъабхуз гизаф читинди ву. Гьарсар набалугъдин хилиъ смартфон а, дурари, телеграм-каналариъ масу туврайи наркотикар гъадагъбан бадали, жюрбежюр рякъяр агуру.
Министри гьацира образованиейин идарйириъ бицIидариз тербия тувбан ляхниз артухъ фикир туврайиваликан, «Важиблубдикан сюгьбат», «Барабардарихъди ихтилатар» тувнайи серенжемар, игитарихъди гюрюшар кIули гъахурайиваликан ктибтнийи. Социальный сетариъра гъизгъинди ляхин гъабхура. Наркотакари ва инсандин кIулин маълиз чIуру тясир апIру дармнари туврайи зарарнакан фукьан артухъди ктибтури гъабхьиш, бицIидариз гьадму темайиан видеороликар, фильмар улупури гъабхьиш, профилактикайин ляхни ужудар натижйир арайиз хиди.
