26-пи ноябриъ Мягьячгъала шагьриъ айи Урус драмтеатрин бицIину залиъ «Дагъустандин юкIв» кIуру РД-йин Правительствойин премия гъадабгъу лауреатарин гала-концерт кIули гъубшну. Думу премияйиз 15 кас лайикь гъахьну. Дурарин арайиъ Табасаран райондин культурайин, спортдин ва туризмдин управлениейин отделин начальникди лихурайи РД-йин культурайин лайикьлу гъуллугъчи Арсен Аслановра а. Думу халкьдин мукьмин алатариинди мукьам йивбан талитнаъ чюнгюр йивбаан гъалиб гъахьну. Дугъаз Дагъустандин культурайин министрин заместитель, РД-йин Халкьдин яратмишарин хулан директор Марита Мугадовайи 2022-пи йисан 22-пи ноябриъ РД-йин Правительствойи адабгънайи къарарниинди тялукь медалра тувну.
Арсен Къазимягьямедович Асланов 1973-пи йисан 30-пи августдиъ Табасаран райондин Хянягъ гъулаъ бабкан гъахьну. Хянгъярин кьялан мектеб ккудубкIну, думу 1991-пи йисан Дагъустандин культурайин училищейин режиссёрвалин отделениейик кучIвну, ва дугъу 1994-пи йисан думу ккудубкIну. Йисарилан Арсен Аслановди, Дагъустандин образованиейин ва культурайин акдемияйин культурологияйин факультет ккудубкIну, заан образование гъадабгъну.
Му кас табасаран, урус, азербайжан ва жара халкьарин мяълийирин устад ву. Арсен Аслановди бицIидихъанмина аьшкьниинди кларнетдиин, зурнайиин, швутIрамиин, балабниин, синтезаториин ва жара алатариин устадвалиинди мукьам йивуз гъудубгъну.
Музыкайин пишекар хайлин йисари Хюрккарин культурайин хулан директорди гъилихну. Думу жюрбежюр конкурсарин гъалибчи вуйиси, Табасаран райондиъ ва Дагъустан республикайиъ гъахьи аьхю кьадар фестиваларин, конкурсарин иштиракчира ву. Думу серенжемар кудухну ккудукIуз читин ву: Вари халкьарин форум-фестиваль «Кавказ – саб хизан» (2016-пи йис), республикайин хьадукран «Навруз» машкврар, вари халкьарин аьдатаринна фольклорин фестиваль «Дагълуйир» (2017–2022-пи йисар), халкьдин мукьмарин форум-фестиваль «Дагълу мукьмар» ва гь. ж.
Аслан Асланов гьацира лезгйирин «Шарвили» кIуру эпосдин фестивалин дипломдин сагьиб, «Кафари Дагъустандин дих» кIуру халкьдин мяълийирин фестивалин лауреат, Республикайин халкьдин яратмиш’валин ва аьдатарин «Ирс» кIуру фестивалин дипломдин, «Рубасдин мукьмар» кIуру республикайин фестиваларин дипломарин сагьиб ву. 2004-пи йисан дугъаз «Дагъустан республикайин культурайин лайикьлу гъуллугъчи» кIуру ччвур тувну.
Табасаран райондиъ ва республикайиъ мяълийириин ва мукьмариин юкIв алидариз Арсен Асланов бажаранлу устадси аьгъя. Жиниб дар, Арсен Къазимягьямедович Дагъустандин ва Урусатдин гизаф гъулариъ ва шагьрариъ сумчрарин кьавалдира, мяълийир апIрурдира гъахьну. Му касдин саб хайлин чав гъидикIу мяълийирна мукьмарра а.
Табасаран райондин культурайин коллективдин арайиъ Арсен Аслановдиз аьхю гьюрмат а. Думу жигьил артистарин насигьятчира ву. Му касдин инсанвалин хусуси лишнарикан улхуруш, сабпи нубатнаъ думу фурс ктру, аьхюр-бицIир аьгъю кас ву. Мугъаз варитIан хуш вуйи ляхин – сягьнайиинна улдучIвну, абцIнайи залиъ тамашичйириз шадвал тувуб, дурарин юкIвар ачмиш апIуб ву.
Арсен Аслановди йисан Дагъустан республикайиъ ва Урусатдиъ айи ихь ватанагьлийирин теклифниинди чан концертарра улупури шулу. Мугъан яратмиш’валин ляхникан ихь чIалниинди вуйи газатар-журналарикра хайлин дибикIна.
«Табасарандин нурар» газатдин терефнаан ихь сягьнайин бажаранлу устад ва культурайин натижалу гъуллугъчи Арсен Асланов дугъаз лайикьлуди туву заан премияйихъди тебрик апIурача! Гъит гележегдиъ дугъан баркаллу ляхниъ хъанара аьхю хъуркьувалар ишри!
