7-пи декабриъ гъабхьи Ватандаш’валин жямяаьтлугъдин артмиш’валин ва инсандин ихтиярар уьрхбан советдин заседаниейиъ Президент Владимир Путинди мялум гъапIганси, сагъламвал уьбхбан цирклин сифтейин звенойиъ ляхин апIурайи районарин больницйирин гъуллугъчйириз ва тяди медицинайин кюмек тувбан гъурулушдиъ лихурайидариз 2023-пи йисан 1-пи январихъан Урусатдин Правительствойи аьлава вуди пулин дакьатар тувуз хъюгъди.

 

Медицинайин цирклин гъуллугъчйирин му гъатарин маважиб 4 агъзурилан 18,5 агъзуриина за хьибди.
Гьаци, кьялан ва районарин боль-ницйирин духтрариз вазлиъ 18,5 агъзур манатдин, сифтейин звенойин духтрариз – 14,5 агъзур манатдин, тяди кюмек тувру духтрариз – 11, 5 агъзур манатдин артухъ маважиб гъюз хъюгъди.

Кьялан ва районарин больницйирин медицинайин кьялан дережайин гъуллугъчйириз вазлиъ 8 агъзур манат, фельдшерариз ва медсестрйириз – 7 агъзур манат, бицIи дережайин гъуллугъчйириз 4 агъзур манат иливиди.

Вице-премьер Татьяна Голиковайин гафариинди, уьлкейин гизаф регионариъ иллагьки медицинайин сифтейин звенойин гъуллугъчйирин кьитвал гьисс апIура. Гьаддиз цIийи йисан эвелихъан думу гъатариз маважибдиин аьлава пул иливбан бадали, декабрин вазлиъ вари лазим вуйи документар къайдайиз хпанди ву.