Гъийин йигъан сар касдикан тмунурикна тарагъру уьзрарихъди женг гъабхбаъ вакцинацияйи важиблу роль уйнамиш апIура.
Урусатдин Федерацияйиъ профилактикайин прививкйир апIбан милли календариз гъадагънайи, сарикан сарикна тарагъру уьзрар инсандин сагъ’вал лап гъагъи гьялназ хрудар ву. Аьхюнуб пай дюшюшариъ уьзур сагъ апIуз шлу хусуси къайда адар, гьаддиз сагъ’валин курс гъагъиб ва гизаф вахтна гъабхруб вуди шулу.
Вари дюн’яйин сагъламвалин тешкилатдиан (ВОЗ) мялумат тувганси, гьар йисан иммунизация гъабхувалин кюмекниинди бугъма, таб алабхъувал (столбняк), коклюш ва кIамкIар уьзрариан 3 миллиондихьна дюшюшариъ инсанар аьжаликкан ккада-гъура. Гьаддихъди сабси, ВОЗ-дин улупбариинди, иммунизацияйин профилактикайин серенжемар лапра яркьуди гъахурайиш, учIру уьзрариан арайиз гъюрайи 1,5 миллион аьжалин дюшюшар хьибдайи.
Урусатдин Федерацияйин статистикайин гьякь-гьисабариан ашкар гъабхьиганси, профилактикайин прививкйирин милли календариин биналамиш духьну, ихь уьлкейиъ 95% агьалйириз прививкайин рубар гъивну. Миди уьзрар асккан дережайиъ дерккна.
Амма, гьаддихъди сабси, диндихъди ва жара себебарихъди аьлакьалу вуди, бязи абйир-бабари чпиз ва чпин бицIидариз прививкйир апIбаз аьксивал улупура. Мицдар дюшюшариъ гизаф бицIидар вакцинайин руб диривди гъузра. Мидланра гъайри, милли календариъ улупнайи прививкйир харижи уьлкйириан ихь уьлкейиз кючмиш шулайидари, гьацира, юрд дипну, уьлкейин айитI саб йишвлан жара йишв’ина кючмиш гъахьи хизанарин вакилари апIурадар. Мидира уьзур тарабгъувализ рякъ ачухъ апIура.
Сар касдизра жиниб дар, ХХ аьсрин кьяларизкьан дюн’яйиъ кIамкIар уьзриан гьар йисан 100 агъзрариинди бицIидар йихури гъахьну. Думу уьзриз «бицIидарин аьжал» кIуру ччвурра тувну гъабхьну.
КIамкIар уьзрин вирус гьавайикди тарабгъуру. Эгер му уьзур дидиз аькси прививка дапIну адру касдикна тарабгъиш, уьзур гьеле-меле сагъ апIуз шулдар. КIамкIар ва гьацира жара тарагъру учIру уьзрар сагъ апIуз вахтниинди кIули гъубху вакцинопрофилактикайи кюмек апIуру. Ичв, ичв веледарин ва багахьлуйирин сагъ’валихьна вижнасуз махьанай, прививкйир апIинай.
