Аьхиримжи йисари ихь жигьил спортсменари чпин хъуркьувалариинди ухьу гизаф рази апIура.

 

 

Нубатнан ражну ихь юкIвариъ мицисдар шадвалин, утканвалин гьиссар уягъ гъапIдар Табасаран райондин «Олимп» спортдин клуб ва 4-пи нумрайин жигьиларинна бицIидарин спортдин мектебдиъ урхурайи живанар ву.

11-пи декабриъ Дербент шагьриъ айи 6-пи нумрайин жигьиларинна бицIидарин спортдин мектебдиъ Кафари Дагъустандин 2006-2015-пи йисари бабкан гъахьи спортсменарин арайиъ юкьяр дисбан спортдиан кьюрдун ачухъ турнир кIули гъубшну. Турнириъ 15 команда иштирак гъахьну.

Табасаран райондиан турнириъ «Олимп» спортдин клубдиъ ва 4-пи нумрайин жигьиларинна бицIидарин спортдин мектебдиъ юкьяр дисбан спортдиан аьгъювалар гъадагъурайи жигьил спортсменар иштирак гъахьнийи. Дурар талитарихьна тренерар ТIагьир Нуровди ва Мурад Аьзизовди гьязур гъапIнийи.

Талитарин натижйириинди, Табасаран райондин командайи 14 пешкешнан йишвар гъидисну. Гьаци, Ибрагьим Муслимовди, Эседуллагь Мягьямедовди, Мустафа Пирмягьямедовди турнириъ сабпи йишвар, Амир Аслановди, Ансар Идрисовди, Мугьяммад Сулеймановди, Рягьим Исмяиловди, Сяид Мустафаевди ва Къурбан Ражабовди – кьюбпи йишвар гъадагъну. Хьурсан жигьил спортсменари – Асхаб Сардаровди, Шихгьяйдар Шиховди, Къазанаф Касимовди, Уьмар Аьлиевди, Эседуллагь Муслимовди – шубубпи йишвар гъазанмиш гъапIну.

Ихь жигьил спортсменар му гъалибвалихъди мубарак апIури, дурариз гележегдиъ хъана заан хъуркьувал ккун апIурахьа.