Шаирариъ чпин эсерариъ багъри юрдар фукьан утканди суратназ хуру. Жвуван гъулкан вуйи дицдар хиялариъ гьарсар касдин манишин ва шадвалин рафтар атIагну шулу. Мидланра гъайри, багъри гъулаз гъягъруган, ухьу бицIидарси рази шулхьа. Амма мицдар гъягъбари гьарган шадвал хуб мумкин дар. Учвура, узуси гъул гъибтну, шагьрариъ яшамиш шулайидар вуш, гьелбетда, йиз гъавриъ ахъдичва.
Гьадму вахтар кIваина хухьа: садакьа пай апIуз гъулан накьварихъна дуфнайидар гъяркъюбси, хулаз дажаргъну, дадайихьан меълишнар ахьуз ужуб дибисну, гьялакди гъягъру бицIидар. Хъа улхьан жергейиъ дийигъуз хъуркьбан бадали, хулазра дурушди, садакьайин меълишнар жибариъ ясана зиълан алабхьнайи ккурттдин канчIлигъинди уч апIури шуйи. Узура йиз чуччу-хъди дици гъягъюри шуйза. Дидхъанмина къад йис гъубшну. Гьамус гъулаз саб хайир-шейирназ ясана тухмариин улукьуз гъягъюри шулза.
Ккудубшу йисан дина хярариз кюмек апIуз гъушнийза. Дадагъярин сабнуб хяраз рякъ гъулан накьварихьантина гъябгъюрайиб вуйи. ГвачIнинган гагайи гъубшву укIан кьяши рюгьлер даргъуз узуна дада гъушнийча. Яркьу рякъ ккудубкIурайи йишвахь накьварин улхьанмина хярахьинди ккидицру йишвахьна хъуркьнийчу. Мушвхьан накьварихъ хъурснайи гъванарна дурарик кайи рягьматдиз душнайидарин шиклар рякъюру. Гьаму вахтна думу терефназди гъилигурин, кIвакан гаркIал ктатганси гъабхьнийиз.
Гъул’ан душну, гьамус урчIвуд йис тамам шулайиз. Думу накьварин багарихьна дяргъюрира гьадмукьан йисар вуйиз. Хъа йиз кIваз аьхю дерд туву гьядиса фу вуйкIан? Накьварихъ хъурснайи гъванари дибиснайи йишв лап аьхю дубхьнайиб гъябкъюнзуз. Фукьан йиз гъуландар рягьматдиз гъушнуш, хабар гъабхьунзуз. Фикир гъафниз, эгер узу мина кми-кмиди гъюри шуйиш, белки, йиз кIваз мициб аьзият даршлийи.
Гьаму арайиъ нивгъари ацIнайи йиз уларихь гьамциб шикил дийибгъу: накьвариз кIури арчил илтIибкIнайи майдандилантина ич мягьлайин 9-10 бицIир яркьу жергейиъди гъягъюйча. Хъа гьамус мушвахь кьюр касдизра гъягъру йишв хьимдайи.
Рякъ давам гъапIча, амма мицибдин кьяляхъ йиз хилариз пучIу таза укIарин чIилли рюгьлер гъванарси гъагъиди гьергъуйи.
Жара ляхнариз артухъ фикир туври, рякъяриъ гизаф вахтар адаури, инсандин уьмур фукьан жикъиб вуш, ухьу кIваълан гьапIрахьа. Гьаддиз дюн’яйиин илмиди уж’вал апIуз, жвуван багахьлуйириз гьюрмат апIуз, сабцIибкьан дурарин багахь гъузуз хъуркьну ккунду.
