Хив райондиъ ватанпервервалин хатI кайи бажаругълу касарихъди гюрюшар гъахувал аьдат дубхьна. Гъи ихь уьлкейиъ гьацдар гюрюшар Ватан уьбхру жюрбежюр гъуллугъариъ намуслувалиинди чпин буржи тамам апIурайи кьягьяларихъдира гъахура. Хъа гъи Украинайиъ кIули гъябгъюрайи хусуси метлеб айи дявдин операцияйиъ Хив райондиан дицдар кьягьялар варжариинди а гъапишра, узу гъалатI даршлубдиин инанмиш вуза.
Гьамусяаьт швнуб-саб вазлиъ дявдин цIин ялавнаъ айи баяр чпиз тувнайи отпускдин йигъариз багъри ругариина жвуван хизан-кюлфетдиин улукьуз гъюра.
Гъийин йиз макьала Мажвгул гъулан мектебдиъ дидин кьюр выпускникдихъди, СВО-йин иштиракчйирихъди кIули гъубху серенжемдикан ву.
Эскрари мяракайин эвелиъ мектебдин мялимариз, урхурайдариз мани салам тувнийи. Мектебдин админис-трацияйин къарарниинди, женгчйири чпин улхуб 8-11-пи классариъ урхурайидарихъди давам гъапIнийи.
«Лазим гъабхьиган, Ватандин гъуллугънаъ хьувал – гьарсар жилижвуван буржи ву. Гъи гьациб йигъ дуфна. Ярхлаз гъягъюдарза ва узкан улхурза. Гьюрматлу чвйир-чйир, узу, ху дапIну, эскрин палат алабхьган, гъи узу Ватандин гъуллугънаъ духьну ккуниб аьгъяйзуз. Эгер ихь уьлкейин кIулиъ айир вахтниинди душмниз къаршуди удучIвундайиш, думу ихь мулкниин хьибдий. Хъа думу ихь абйир-бабариз хъана аьхю гуж вуйи. ИкибаштIан, дявди бедбахтвалтIан жараб фукIа хурдар. Ихь абйир-бабари гъазанмиш дапIнайи Гъалибвал ухь’ин алабхъган хил’ан идипухьа?! Дярябкъри, я Рабби, хъа закур лазим гъабхьиш, ихь абйирин ирс давам апIури, учвура ичв жандиъ убхьурайи дагълу ифи улупрубдиин умудлу вуза» – къайд гъапIнийи чан улхбаъ Байранбег Байранбеговди.
Дугъан улхуб Феликс Маллаевди давам гъапIнийи. «Гъи Украинайин сяргьятариин гъябгъюрайи дявдиъра ихь чйир, кьасабарвал, духтирвал апIури, кьягьяларин гъаразнаъ а. Учвустар малайикари хътаурайи кагъзари дурарик гьевес капIра. Ихь бабарин дюъ-йири гьякаларси уьрхюрачу, хъа учву хътапIурайи сурсатдикан дарман шулачуз. Чухсагъул ва икрам учвуз, дустар».
Мектебдин директор Анвер Хидировди, урхурайдарихъди гъубху сюгьбатназ ва Ватан уьбхбак чпин пай киврайивализ лигну, эскрариз мектебдин администрацияйин терефнаан чухсагъул мялум гъапIнийи.
Серенжемдин аьхириъ уч духьнайидари, СВО-йиъ чпин жанар фида гъапIу мектебдин выпускникар Кемран Гьяжимягьямедов, Гюлмягьямад Къалабегов, Алавудин Ярялиев, Мизамудин Зульфикьаров ва Абрик Мирзакеримов кIваин апIури, саб дакьикьайиъ ккебехъну дугъужвну, дурарин шиклар али партайиин кюкйир дивнийи.
