Аьхиримжи вахтна Украинайиъ гъягъюрайи гьядисйирихъди аьлакьалу вуди ихь республикайиъ кми-кмиди жюрбежюр серенжемар тешкил апIура. Улихьнаси Дербент шагьрин Дявдин машгьурвалин музейиъ шагьрин 18-пи нумрайин Вари дюн’йин культурайин гимназияйиъ бабан чIалнан дарсар киврайи мялим Сарида Семедовайи 8-пи классдиъ урхурайи баяр-шубарихъди «Ватандин Игитар» кIуру ачухъ дарс тешкил гъапIну.
Му дарс гъабхбан асас метлеб – музейиз дуфнайи баяр-шубариз Ватандин Ахью дявдиъ иштирак гъахьи женгчи шаирар Багьаудин ва МутIалиб Митароварин, Ибрагьим Шагьмардановдин уьмрикан ва яратмиш апIбарикан мялуматар тувувал, дурарин эсерариъ атIагнайи ватанпервалин гьиссар улупувал ва урхурайидар гъийин девриъ Урусатдин Яракьлу кьувватарин жвуван ватандиз вафалу вуйи эскрари намуслуди чпин буржи тамам апIбахъди таниш апIувал вуйи.
БицIидари табасаран шаирарин эсерар кIваъланди гъурхнийи. Серенжемдиъ Дагъустандин лайкьлу артист Гюльниса Агъаевайи, Юсуф Базутаевдин «Дадайиз» кIуру шиир дурхну, ватандикан вуйи мяъли гъапIнийи.
Дявдин машгьурвалин музейин гъуллугъчи Гюлпери Мирзабалаевайи гьамусяаьт Украинайин аьтрафариин гъябгъюрайи хусуси метлеб айи операцияйиъ Ватандин маракьар бадали чпин уьмрар фида гъапIу Игитарикан, дагъустан эскрарин кьягьялваликан ктибтнийи.
«Гирами баяр-шубар ва мялимар, Дявдин машгьурвалин музей ислягьвал уьбхюрайи ва Ватан бадали чпин жанар фида гъапIу Игитариз бахш дапIнайиб ву. Ихь адлу шаирар Багьаудин ва МутIалиб Митароварин, Ибрагьим Шагьмардановдин эсерарихъди ухьу бицIи классариъ урхури имидитIан таниш вухьа. Дурари чпин эсерариъ фици ихь аьхю абйир Ватандин Аьхю дявдин женгариъ иштирак гъахьнуш, фицдар хъуркьувалариинди ихь Ватан азад гъапIнуш, улупна. Гъи учвуз рябкъюрайи ачухъ мисал – Украинайиъ гъягъюрайи гъизгъин женгариъ жигьил эскрари Ватан бадали чпин жанар фида апIура. Йиз фикриан, дурар мектебдиъ урхури имиди ихь женгчи шаирарин эсерариъ атIагнайи ватанпересвалин гьиссариинди тербияламиш дапIнайидар ву. Думу Игитарин – Байрамбег Ибрагьимпашаевдин, Кемран Гьяжимягьямедовдин, Салман Сулеймановдин – шиклар Дявдин машгьурвалин музейиъ ва тарихнаъ гъаммишан гъузиди», – аьлава гъапIнийи Гюльпери Шябановнайи.
Йиз фикриан, урхурайидариз ватанпересвалин тербия тувбан мицдар маракьлу дарсар киври гъахьиш, ихь аьхю шулайи насларин фикрарра, гележегра ужувлахъинди дигиш хьиди.
