Мобилизация дапIнайидариз ликариин алахьрудар дирхура
Табасаран райондин СикIа гъул’ан вуйи хусуси алверчи Максим Казимовди (шиклиъ), мобилизация дапIнайидариз кьюрдун ликариин алахьрудар дирхури, чан терефнаан тялукь кюмек апIура.
Райондин администрацияйиан «Табасарандин нурар» газатдиз туву мялуматниинди, мобилизация дапIнайидариз ва дурарин хизанариз кюмек апIбан «Ухьу сатIиди» кIуру волонтерарин штабдиз духну, Максимди 50 жут ликарин кьамкьарихънакьан гъюру мани батинкйир тувну.
Мягьячгъала шагьриъ Максим Казимовдин жиларин ликариин алахьрудар дирхру «Макс» кIуру хусуси кархана а.
Табасаран райондин улихь-кIулихь хьайидари, мобилизация дапIнайидариз ва дурарин хизанариз кюмек туврайидариз чухсагъул кIури, дурариз райондин кIулиъ айирин ччвурнахъан аферин мялум апIура.
Табасаран райондин кIулиъ айи Мягьямед Къурбановдин табшуругънинди, СВО-йиъ иштирак шулайи эскрариз нубатнан гуманитарный кюмек хьади райондин администрацияйиъ главайин жямяаьтлугъдин хатIасузвалин ляхнариз лигру заместитель Ринат Мирзабалаев ва райондин депутатарин собраниейин председателин заместитель Яшар Аьбдулов гъягъбанди ву.
БицIидариз машквар тешкил гъапIну
ООО «Славица Каспий» тешкилатдин генеральный директор Нелли Пирмя-гьямедовайи Хив райондиан мобилизация дапIнайидарин хизанариз итIру тадарукар айи пакетар, хъа бицIидариз – ЦIийи йисаз пешкешар тувну. Рягьимлувалин му акцияйиъ Хив райондин глава Ярмет Ярметовра иштирак гъахьну.
Гьаддин гьякьнаан муниципалитетдин пресс-гъуллугъну мялумат тувра.
Серенжемдиъ удучIвну улхури, райондин кIулиъ ъайири ихь ватандашариз СВО-йиъ иштирак’вал апIуз тясир гъапIу дюшюшар кIваин гъапIну, ва Нелли Пирмягьямедовайиз, бицIидариз мициб машквар тешкил апIбаз лигну, чухсагъул мялум апIбан кагъаз тувну.
«Рягьимлувалин му акцияйи ихь райондиан вуйи алверчйир гъийин гьядисйирихьна вижнасузвалиинди янашмиш шули адрувал улупура. Дурар, мобилизация дапIнайидаризси, дурарин хизанаризра кюмек тувбаъ жанлуди иштирак шула. Гьацира рягьимлувалин кюмек уч апIруганра дурар гъирагъдиъ гъузри шулдар», – гъапну муниципалитетдин кIулиъ айири.
Серенжемдин дахилнаъди культурайин гъуллугъчйири бицIидариз вуйи, ЦIийи йисаз бахш дапIнайи шадлугънан мяракара кIули гъубхну. БицIидари, дадйирихъди ёлкайилан илтIикIури, улубкьурайи машкврин аьшкь гьисс гъапIну.
