ВаритIан зарбди жаргъру табасаран риш

 

Ноябрин эвелариъ Санкт-Петербург шагьриъ жаргъбаан вари Урусатдин марафон кIули гъубшну. Думу талитариъ 1000-рихьна инсанар иштирак гъахьну, гьадму гьисабнаан Мягьячгъала шагьриъ чан хизандихъди яшамиш шулайи Табасаран райондин ТинитI гъул’ан вуйи Милана Дадашевара. Дугъу талитариъ кьюбпи йишв гъазанмиш гъапIну.

Миланайин гьеле 12 йистIан даршра, думу Дагъустандин чемпионатариъ швнуб-саб ражари гъалибчи гъахьну. Чан таярин арайиъ думуси зарбди жаргърур Дагъустандиъ адар. Аьхюдарин арайиъ вуйи талитариъра Милана саки гьаммишан шубурпир шула. 2021-пи йисан Чечен Республикайиъ кIули гъушу кьюбиб марафонариъра дугъу варитIан заан натижйир гъазанмиш гъапIну.
Милана Мягьячгъала шагьриъ 34-пи мектебдиъ 7-пи классдиъ урхура. Мектебдиъ дугъан шикил варитIан ужуди дарсар аьгъю ва бажаранлу ученикар кайи доскайик кебхна.
Миланайин адаш Максимра кьюд йис улихьна вари Урусатдин марафондиъ 42 километр манзилназ жаргъбаъ чемпион гъахьну