«Рукьан адми»
Дюн’яйин варитIан ягъал дагъларин (Килиманджаро, Эльбрус, Аконкагуа ва гь. ж.) кIакIар мютIюгъ дапIнайи Табасаран райондин Гюгьрягъ гъул’ан вуйи ихь ватанагьли Аслан Гьяжиагъаевди, цци спортдиан «Рукьан адми» ччвурра гъазанмиш гъапIну.
Учв пишекарвалин спортсмен дарди, триатлон спортдиан гъалиб гъахьи Аслан Гьяжиагъаев, спордин жюрбежюр жюрйириин машгъул духьну 6 йис ву. Гьаму йисарин арайиъ дугъу, хайлин марафонариъ иштирак шули, гъалибвалин йишварра гъазанмиш дапIна. Ихь спортсмен жаргъузра, сирнав апIузра, велосипед хъапIузра удукьурайир вуйивализ лигну, дугъу триатлон спортдин талитариъ иштирак хьуз кьаст дапIну, му тадлитарихьна 9 вазлин арайиъ гьязур гъахьну.
Триатлон – сирнав апIувал, велосипед хъапIу гъягъювал ва жаргъувал сатIи дапIнайи спортдин талит ву. «Рукьан адми» кIуру ччвур гъазанмиш апIбан бадали, дугъан яшарин (50 йис) категорияйиъ айидари 16 сяаьтнан арайиъ гьюлик кахъну, 4 километрин манзилнаъ сирнав дапIну, хъасин 180 километрин манзилнаъ велосипед хъапIну ва 42 километрин манзилнаъ дажаргъну ккундийи, хъа Аслан Гьяжиагъаев 12 сяаьтна 50 дакьикьайин арайиъ вари тамам дапIну, финишдиз хъуркьну. Дугъаз медалра, вари халкьарин арайиъ вуйи рейтингдиъра, «Рукьан адми» кIуру ччвурра тувну.
