«Уьмур гьаму ляхниз бахш дапIназа…»
Ихь тамашичйирин аьхю юкIв али актер, Гьюкуматдин табасаран драмтеатрин сягьнайин текрарвал адру устад Физули Маллаевдиз улихьнаси «Дагъустан Республикайин лайикьлу артист» кIуру заан ччвур тувну. Гъийин йигъаз сягьнайиин дугъу дизигнайи зегьметну ва халкьдин арайиъ гъазанмиш дапIнайи марцци гьюрматну думу чан пишейиъ заан ччвурарин дережайиъ айивал субут апIура.
Артиствалихъди сатIиди, Физулийи хайлин йисари театрин музыкайин пайнан рУководителин ляхинра кIули гъубхну. Театри диву гизаф спектаклар, иллагьки бицIидариз вуйидар, музыкайин терефнаан Физули Маллаевди албагнайидар ву. Мяълийирин устадвалси, дугъаз композиторвалин, яна мукьмар яратмиш апIбан зигьимра а.
Физули Маллаев 1977-пи йисан 1-пи ноябриъ Хив райондин Ляхла гъулаъ литературайинна музыкайин майдан ва мядан вуйи хизандиъ бабкан гъахьну. (Дугъан адаш Маллакерим Маллаев гъийин деврин табасаран литературайиъ чан лайикьлу йишв гъибису аьхю шаирси ва баяр-шубариз илим кивбаъ аку шил гъибту педагогси мялум ву.)
Физули Маллаевдин сягьнайин устадвал ва тясирлувал дугъу уйнамиш дапIнайи аьхю кьадар ролариъ ачмиш ва йислан-йисаз аргъаж гъабхьну. Дугъан тамашичйириз ккуни ролар лап жюрбежюрдар ву, ва дурар кайи спектакларин кьадар кудухну ккудукIуз даршлубкьан гизаф ву.
Физулийи театрин гьар йигъандин аьдати уьмриъ апIурайи ляхни гьяйран хьуз гъитру. Шлин компьютер либхурадарш, наан акв кабхьрадарш ва шнурар пуч духьнаш, шлиз фициб мукьам лазим вуш, яна фициб гъалаб наан аш – думу гьадина, сягьнайиина фици шадди удучIвуруш, гьаци хъуркьру ва, аьлхъюри, зарафатар апIури, месэла гьял апIуру. Гьадму ляхнин тамамвал ва бажаранвал дугъан аьдати уьмриъра, сягьнайинра саб кIалбинуб ву.
