Уьмур — накьишариъ

 

 

Чан кьадарназ дилигну, варитIан гизаф художник дишагьлийир айи халкьарикан саб табасаран халкь ву кIури, хиял вуйиз. Фицики гьарсар халачичи художник ву. Гьаци вушра, чав гъизигу шиклариинди пишекар художник вуйивал тасдикь дубхьнайи дишагьлийир ихь миллетдигъ лап цIибтIан гъядар. Дурарикан сар вуйи Шагьнабат Аьлимягьямедовайи гъизигу шикларин выставка цци кюгьне Дербентдин Нарин-гъалайиъ гьатIабццну.

Шагьнабат живописдиин лихуз 2015-пи йисан хъюгъну, ва дугъан шиклар асас вуди абстракцияйин хатIниинди яратмиш дапIнайидар ву. 2021-пи йисан Шагьнабатдин яратмишарин кIул’инди вуйи выставка гъабхьну.

Дербентдин гъалайиъ гъабхьи выставкайиз аьхю кьадар инсанар гъафну ва дурар табасаран шуру рангариинди улупнайи гьиссарин ва уьлчмйирин аьламатнан дюн’яйихъди таниш гъап1ну. Дугъан «Дада», «Къутармиш хьуб», «Уьру халачи», «Назук’вал», «Завуз удучIвуб» кIуру шиклар варит1ан гизаф тясир апIрудар ву.