Гьюрматлу ватанагьлийир!
Йисандин аьхириъ йисандин арайиъ кIули гъубху ляхнин, гъазанмиш гъапIу хъуркьуваларин натижйир йивури аьдат ву. Цци учура, «Табасарандин нурар» газатдин редакцияйин коллективди, 2022-пи йисан учу кIули гъубху ляхнин натижйир йивурача. Газатдин аьхиримжи нумра аьдати дару саягъниинди чапдиан адабгъуз мясляаьт гъапIунча. Йисандин арайиъ газатдин машариъ чап гъапIу, ихь халкьдин уьмрин жюрбежюр цирклариз, дурариъ лихурайи ватанагьлийириз бахш дапIнайи макьалйиригъян ич фикриан варитIан ужударсдар гъядягъну, дурар саб-швнуб номинацияйиз пай гъапIунча. Натижайиъ фу гъабхьнуш, учву кьимат тувай!
ЙИСАНДИН ЮБИЛЕЙ
Яв табариъ либхури а бабан чIал
3-пи декабриъ Мягьячгъалайиъ Дагъустандин гьюкуматдин педагогвалин университетдиъ «Табасарандин нурар» газатдин 90 йисандин юбилей яркьуди къайд гъапIну. Шадлугънан серенжемдиъ табасаран халкьдин хайлин вакилар – тамам апIру гьюкмин гъуллугъчйир, депутатар, районарин ва шагьрарин кIулиъ айидар, илимдин, культурайин, образованиейин вакилар, жямяаьтлугъ касар, газатдин вафалу дустар иштирак гъахьнийи.
УдучIвну гъулхдари газат ва дидин коллектив, ва гьацира табасаран халкь му мяналу гьядисайихъди тебрик гъапIнийи. Газатдин кIулин редактор Гюлягьмад Маллялиевди уч духьнайидариз газатдин 90 йисандин рякъ фици ккебгънуш, дидиз фуж яракар гъахьнуш, рякъюъ фицдар гъванар ва нирар гьахьри гъахьнуш, хъайи-хъайиганси ктибтнийи.
Серенжемдиъ газатдиъ гизаф йисари гъилиху журналистариз ва гъийин йигъан душваъ лихурайидариз пешкешар, грамотйир тувнийи. Мяракайиз дуфнайи вари хялариз редакцияйин терефнаан юбилейихъди аьлакьалу савкьатар бахш гъапIнийи.
Серенжемдин аьхириъ табасаран машгьур артистари сифте ражари вуди сягьнайилан «Табасарандин нурар» газатдин гимн тамам гъапIнийи. Мукьам машгьур табасаран композитор Кьасум Мягьямедовдин, мукьмин аранжировка композитор Мюгьюряли Аьбдуллаевдин, гафар табасаран шаир, газатдин корреспондент Эльмира Аьшурбеговайин вуйи гимн юбилейиз дуфнайидари лап маниди кьабул гъапIнийи.
Гъит ихь халкь сатIи апIурайи, деврарин арайиъ чIиви аьлакьа дебккрайи тарихчи газат уьмурлугъ гъубзри.
