Декабрин аьхиримжи йигъари РД-йин Правительствойин председатель Аьбдулмуслим Аьбдулмуслимов кIулиъ айи Дагъустандин делегация Луганскдин Халкьдин Республикайиз гъубшну.
РД-йин Правительствойин пресс- гъуллугънаан мялум гъапIганси, делегацияйин дахилнаъ Дагъустандин Правительствойин ва Главайин администрацияйин кIулиъ айирин сарпи заместитель Мягьяч Уьмаров, РД-йин военный комиссар Дайтбег Мустафаев, цифровой артмиш’валин министр Юрий Гьямзатов, жигьиларин ляхнариз лигру министр Камил Сяидов, гъулан мяишатдин министрин заместитель Зураб Къуччаев айи.
Дагъустандин Глава Сергей Меликовдин табшуругъниинди РД- йин премьер-министри ЛНР-из рягьимлувалин аьхю кюмек гъубхну, социальный цирклин тешкилатариз гъушну, ЛНР-рин кIулиъ айидарихъди ва хусуси метлеб айи дявдин операцияйиъ иштирак шулайи эскрарихъди гюрюшмиш гъахьну.
Луганскдиъ кIули гъахру гюрюшарин программайиъ сабпи нубатнаъди бицIидар улубкьурайи ЦIийи йисахъди тебрик апIувал айи. Аьбдулмуслим Аьбдулмуслимов Луганскдин 18- пи нумрайин мектебдиз ва 129-пи нумрайин бицIидарин ясли-багъдиз гъушну ва 1000 бицIириз меълишнар ва уюнжагъар айи пешкешар багъиш гъапIну.
БицIидар рази апIбан кьяляхъ, РД-йин премьер-министр чан делегацияйихъди Луганскдин Халкьдин Республикайин Правительствойин кIулиъ айи Сергей Козловдихъди гю- рюшмиш гъахьну.
Гюрюш кьюбиб республикйирин дуствалин аьлаькйир йитIбан месэлйириз бахш гъапIнийи. Аьбдулмуслим Аьбдулмуслимовди кьибла республикайин терефнаан ЛНР-из лазим вуйи вари кюмек тувуз гьязур вуйиваликан гъапну.
Думу йигъан Аьбдулмуслим Аьбдулмуслимов Урусатдин Игит, ЛНР-рин халкьлин милицияйин кьюбпи армияйин корпусдин командующий Эседуллагь Абачевдихъди ва Урусатдин ва ЛНР-ин Игит, «Ахмат» СОБР-ин командир Апти Алаудиновдихъди гюрюшмиш гъахьнийи.
Кьюрид генераларира РД-йин Глава Сергей Меликовдиз эскрариз рягьимлувалин кюмек тувбаз ва дявдин гьяракатар гъягъюрайи йишваз республикайин делегация гьапIувализ чухсагъул мялум гъапIнийи.
Апти Алаудиновди къайд гъапIганси, «Ахмат» СОБР-ин эскрарин арайиъ хайлин дагъустанлуйир ва жара миллетарин баяр а. Саки вари 2-пи, 3-пи ражари контрактдиинди лихурайидар ву. «Мушваъ учу вари саб аьхю ва албагу хизан вуча. Узуз фуж фуну миллетдин вакил вуш фикир апIурадарза.
Фронтдиъ учу вари гъардшар вуча ва ич метлеб саб вуйич», – гъапну А.Алаудиновди.
Эседуллагь Абачевди чан нубатнаъ эскрарин дирбаш’вал жаради къайд гъапIну. «Гъалибвал ухьуз хьибди, саб шакра адарди текрар апIурза. Учу анжагъ улихь гъягъюрача. Магьа гьаму йигъари Дагъустандин шагьрариан ва рай нарин бицIидарихьан кагъзар гъафунчуз. Дугъриданра, ихь бицIидар – гележегдин ватанпересар ву. Узу саб кагъаз гъурхунза. Душвак бицIидари, гъалибвал гъадабгъну кьяляхъ гъачай, кIури дибикIнайи. Учу думу тIалаб тамам апIуз гаф туврача», – гъапнийи дугъу.
Дагъустандиан СВО-йиъ итирак`вал апIурайи эскрариз туву рягьимлувалин кюмекнан дахилнаъ дармнар, дахъру мани шишлар, кьюрдун мани палат ва ликариин алахьрудар, газран горелкйир, термосар, итIру сурсатар, 14 квадрокоптер ва гьацира жара шей`ар айи.
Эскрарихъди вуйи сюгьбатнаъ Дагъустандин премьери къайд гъапIнийи: «КIваинди гъибтай, учуз учву кIваълан гьархнадарчуз. Учу ичв гъвалахъ хъача. К1улин командующийди ичв улихь дивнайи метлебар учву ужуб тажруба айи генералар Эседуллагь Абачевдин ва Апти Алаудиновдин регьберваликкди хъуркьувалинди тамам апIурайивалиин учу лап рази вуча.
Учу мина гъюбан асас метлеб – учвуз дугъриданра фтин ва фициб кюмек лазим вуш аьгъю апIувал вуйич.
Фицики, учу хулаъ деънача, хъа учву дявдин улхьан жергйириъ ачва».
Дагъустандин делегацияйи Украинайин яракьлу кьувватари йивну гъийиху ислягь ватандашариз тикмиш дапIнайи ядигарихъ кюкйирра дивнийи
