Гъийин девриъ ихь арайиъ чпиз гьаммишан гьюкуматдин ва жямяаьтлугъдин терефнаан кюмек тувувал ва гъайгъу зигувал тIалаб апIурайи инсанар, асас вуди бицIидар, гизаф а. Сагъламвалин терефнаан сяргьятламиш дапIнайи мумкинвалар айи дицдар касариз кюмек апIувал аьхю сабабнан ляхин ву. Аьхиримжи вахтна ихь уьлкейиъ му жюрейин, бедендик шикаствал кайи касариз кюмек тувру хайлин тешкилатар арайиз хура ва жюрбежюр уьлчмйир кьабул апIура. Дурар кьабул апIбан асас себеб – инвалидариз жямяаьтлугъдин уьмриъ иштирак’вал апIуз варидаризстар барабар шартIар яратмиш апIувал ву.
Инвалидарихьан гъагъи зегьмет зигуз шулдар, гьаци вушра дурарин арайиъ зирек’вал, бажармиш’вал кайи, зигьимлу ва жюрбежюр ляхнар апIуз удукьру касар гизаф ади шулу. Чпик кайи гьунарариз лигну, думу касари ихь уьмрин жюрбежюр цирклариъ – илимдиъ, спортдиъ, бизнесдиъ, художествойин яратмиш апIбан цирклиъ, искусствойиъ ва гь. ж. аьхю хъуркьувалар гъазанмиш апIура. Дурариз ккунди айиб, ухьу чпиз гьюрмат дапIну, чпик кайи бажаранвализ кьимат тувувал, чпин ихтиярар ва саламатвал уьрхювал ву.
Дагъустан Республи-кайин Табасаран райондиъ айи вари урусатдин инвалидарин жямяаьтлугъдин тешкилатдин кIулиъ айи Уружбег Демирбеговди, инвалидар ЦIийи 2023-пи йисахъди мубарак апIури, къайд гъапIнийи: «Гьюрматлу ватандашар, марцци кIваан вуйи мубаракнан гафар кьабул апIинай. ВаритIан ккуни машкври ихь кIваъ гъузру мукьмарихъди, ачухъ хилихъди вари жилиин уж’вална разивал, шадвална аьлхъюб тарагъри! ТIилисим кайи му машкври ихь уьмриъ цIийи маш абццри. Гъит ЦIийи йисан ичв кIваъ айи хиялар варидарин кIулиз удучIври. Гъит уьмрин гьарсаб мурччвахъ учвуз ужувлан гьядисйир ккилигри, ичв ккунидарин ва багахьлу касарин, дустарин кюмекну шад апIричву».
Мициб йигъан ихь арайиъ яшамиш шулайи гьамцдар инсанарикан, дурарира ужуб, архаинвалин яшайиш, лайикьлу уьмур хъапIну ккуниваликан, дураризра зегьмет зигуз ва рягьятвал гъадабгъуз мумкинвал дубхьну ккуниваликан варидиз кIваин апIувал артухъ хьибдар. Ухьу вари инсанар вухьа, эгер ухьу дицдар касариз кюмекнан хил гьачIабккиш, дурарин бедендин сакьатвалихъди аьлакьалу читинваларра цIиб хьиди, хъа уьмур ужувлахъинди илтIибкIиди.
Сагъламвалин терефнаан цIиб зяифвал кайи вари ихь ватандашариз «Табасарандин нурар» газатдин коллективдин терефнаан улубкьурайи ЦIийи йисандин машквар мубарак апIураза. Гъит улубкьурайи йисан ичв сагъ’вал мюгькам ибшри, ичв фикрар, хиялар, умудар учвуз ккуниси кIулиз удучIври!
