Республикайин образованиейин ва илимдин министерствойиъ улубкьнайи йисан «РД-йин йисандин мялим» конкурсдин сабпи пай гъабхувалихьна гьязур хьпан тешкиллувалин комитетдин заседание кIули гъубшну. Дидин гьякьнаан министерствойин пресс-гъуллугъну мялум гъапIну.

 

Думу ачмиш апIури, РД-йин образованиейин ва илимдин министр Ягь’я Бучаевди къайд гъапIганси, Дагъустандин образованиейин гъурулушдиъ му конкурс гъабхувалин эгьемият зурбаб ву. «Конкурсдин серенжемар 2023-пи йисан Мялимдин ва насигьятчийин йис къайд апIбахъди сатIи дапIну ккунду», – гъапну министри.
Министрин заместитель Аида Далгатовайи чан улхбаъ мялум гъапIганси, конкурсдин сабпи пай 16-31-пи январиъ республикайин хьуб муниципалитетдиъ кIули гъябгъиди.
Заседаниейиъ тешкиллувалин комитетди конкурсдин серенжемар гъахбан сценарий гьязур гъапIнийи, махлукьатлу хабрарин дакьатариъ думу яркьуди тарабгъуваликан ва техникайин лазим шлу алатарихъди тямин апIуваликан гъулхнийи.

Чан удучIвну улхбаъ ДИРО-йин ректор Гульнара Аьгьмедовайи улихьна йисари конкурс гъабхруган арайиз гъафи читинваларикан ва, дурар арайиан адагъбан бадали, кьабул дапIну ккуни уьлчмйирикан гъапнийи.

«Цци конкурсдиъ иштирак хьуз ккунидарихьан ДИРО-йиъ «Пишекарвалин конкурсар – мялимдин асас удукьувалар хъана аргъаж апIбан бина» программайиан квалификация за апIбан модулин курсариз гъюз шулу. Дурар 144 сяаьтдиндар ва мялимдин методикайин пишекарвал за апIуз кюмек туврудар ву. Курсар 4 модулиз жара дапIна, ва дурарикан гьарсаб жа-жаради аьгъю апIуз шулу», – мялумат тувнийи дугъу.

Гульнара Аьгьмедовайин гафариз асас духьну, мицдар конкурсар Урусатдин саб региондиъра адар. Дурарин модуларин спикерар жюрбежюр пишекрар, гьадму гьисабнаан «Йисандин мялим» конкурсдин федеральный этапдин лауреатар ва пешкешнан йишварин сагьибар ву.