Дагъустандин гьавайин шартIар ужудар вуйивализ лигну, аьхиримжи вахтна республикайиъ 10 йис мидиз улихьна зат гьясил дарапIри гъахьи мейвйир ва йимишар урзуз хъюгъна. Гьацдар мейвйирикан улхури, пуз шулуки, сач Дербент райондиъ 200 гектар хутIлариъ ярхи жюрейин (пекиндин) келем дубзна ва улихьна йигъари дидин бегьер уч апIуз хъюгъну.
Дербент райондин Музаим гъулаъ айи му сортнан келем дубзнайи Аьлибег Ражабовдин мяишатдиъ 7 гектарин хутIлиан думу уч апIбан ляхнар фици кIули гъягъюраш ахтармиш апIуз, дина, райондин гъулан мяишатдин управлениейин кIулиъ айи Юсиф Герейхановра хъади, Дагъустан Республикайин гъулан мяишатдин ва ипIру-убхъру сурсатарин министрин сарпи заместитель Шарип Шарипов гъушнийи.
Келем уч апIурайи гьаму хутIлиъ 50 касди ляхин апIура, хъа мяишатдин кIулиъ айи Аьлибег Ражабовдин, хутIил хъанара яркьу дапIну, душваъ жара мейвйирра кивуз планар а. Кьюрдун вахна вушра, Дербент район келем гьясил апIуз гьавайин ужудар шартIар айи йишв ву. Гьаддиз, январин вазлиъ келем ккадабцIура кIури, мюгьталра духьну ккундар. Саб гьаму ваъ, йисандин арайиъ Дербент райондиъ швнуб-саб ражари мейвйир урзури, дурарин бегьер уч апIури шулу. Магьа гьамусяаьт чIат йифар дахьнашра, Дагъустандиъ гьясил апIурайи итIру сурсатар хутIлиан дишлади агьалйирин суфрайихъна хурайивалин шагьидар вухьа.
Мяишатдихъди таниш гъахьи Шарип Шариповдин гафариинди, Дагъустан келемдин ватан ву. Янаки, гъийин йигъан Урусатдиъ келем убзурайи хутIларин жиларикан 19% Дагъустандиъ а. Хъа СКФО-йин регионарин арайиъ ихь республикайи 80% дибисна.
«Дагъустандиъ мейвйир гьясил апIувал ужуди улихь гъябгъюра. Циркил артмиш хьпан варитIан асас себеб – республикайиъ айи зегьметкеш агьалйир ву. Дербент райондин гьякьнаан улхуруш, хайлин йисари мушваъ йимишар, мейвйир гьясил апIувализ лигну, му райондин агьалйир, жюрбежюр мейвйир артмиш хьпан бадали, ишлетмиш апIру вари рякъярихъди таниш ву. Гьаци вуйиганси, мушваъ пекинский келем убзури ва ккадабцIури магьа 10 йискьан ву. Му сагъламвал мюгькам апIуз гизаф ужуб культура ву. Думу кIул ва юкIв иццруган, кефйир адруган ва нервйир къайдасуз гьялнаъ айиган гизаф кюмек апIру мейва ву. Гьаци вуйиган, ригъ гьудубчIвру терефнан гьюкуматариъ му келем гизаф йисари яшамиш хьуз кюмек апIурайи чешнеси гьисаб апIура», – аьлава гъапIну министрин заместители.
Дугъриданра, зегьмет гъизигиган, гъюрдариинра бегьер ктIубчIвуз гъитуз шулу.
