Гъубшу йисан 12-пи январиъ Урусатдин прокуратурайи чан 300 йисандин юбилей къайд гъапIнийи. Урусатдиъ Петр Сарпирин девриъ «писвал, зяиф ляхнариъ къайдасузвалар, руш’ватчивал, къанунсузвал терг апIбан» месэла гьял апIбан бадали, яратмиш гъапIу прокуратурайин органари ляхин апIури магьа 300 йистIан артухъ ву.
Императори Урусатдин сарпи генерал-прокурорди граф Павел Ягужинский тяйин гъапIнийи.
Дагъустандин прокуратурайин органарин тарихра маракьлуб ва девлетлуб ву. 1922-пи йисан 30-пи июлиъ ДАССР-ин ЦИК-дин къарарниинди, ДАССР-рин юстицияйин наркоматдин дахилнаъди прокуратурайин отдел арайиз гъабхнийи.
Инкъилабдин кьяляхъ читин йисари (1923-пи йисан 1-пи октябриз) Дагъустандин прокуратурайин отдел сар гъуллугъчийикан ибарат вуйи, дугъу юстицияйин наркомдин заместителин вазифйирра тамам апIури гъахьну. Мягьячгъалайиъ, Кизляриъ, Дербентдиъ, Буйнакскдиъ прокурорин кюмекчйирин 4 камера айи.
1938-пи йисан ДАССР-ин Прокуратурайин кьялан аппаратдин дахилнаъ прокурор, кадрйирин ляхнариз лигру прокурор, дустгъарин прокурор ва секретарь, гьацира исихъ улупнайи подразделенйир айи: ляхнин идара гъабхру, уголовный ва силисчивалин отдел, уголовный суддин отдел, ватандашарин аьрзйириз лигру отдел. Штатдиъ 40 каскьан айи.
Ватандин Аьхю дявдин гъагъи йисари Дагъустандин прокуратурайи чан читин ляхин кIули гъабхури гъахьну. Думу вахтна Ватан душмандихьан уьбхбаккан кIул ккадабгърударихъди, гьюкмиз аьксивал улупрударихъди женг гъабхувал прокуратурайин ихтиярнаъ ади гъабхьну. Мидланра савайи, халкьдин мяишатдин гьарсаб цирклиъ – экономикайиъ, гьясиллувалиъ мугъаятвал уьбхювал чарасуз лазим вуйи.
Вахтну улупурайиганси, дявдин йисариси гьамусра прокурорвалин гюзчивал чарасуз лазим ву. 2019-пи йисхъан мина гъийин йигъаз Дагъустан Республикайин Прокуратурайин кIулиъ Алексей Ежов а.
Дагъустан Республикайин Прокуратурайин артмиш’валик лайикьлу пай киву прокурорарин ччвурарра ктудухди гъитуз шулдар. Думу сиягънаъ Александр Ивановдин, Николай Болдыревдин, Николай Сапожников-дин, Аьгьмед Пакаловдин, Мягьямед Ибрагьимовдин, Салман Гьяжимягьямедовдин, Мягьямед Мирзаевдин, Имам Ярялиевдин, Игорь Ткачевдин, Андрей Назаровдин, Рамазан Шагьнавазовдин, Денис Поповдин ччвурар а.
Советарин Союз дабгъбан кьяляхъ йисар вари Урусатдизси Дагъустан Республикайизра аьхю дигиш’валарин вахт гъабхьну. Уьлкейин политикайин ва экономикайин артмиш’вал, идеология дигиш гъабхьиган, прокуратурайин органрин ляхниъра дигиш’валар дархьиди гъузундар. Хъа фуну жюрейин дигиш’валар гъахьишра, прокуратурайин гъуллугъчйирин асас месэла – Урусатдин Федерацияйин аьт-рафариин кьувватнаъ айи къанунди агьалйириз тувнайи ихтиярар тамам апIбиин гюзчивал гъабхувал вуди гъубзра.
Прокуратурайин органарин ветеранар, гъуллугъчйир, ичв пишекарвалин машквар мубарак апIури, къанун уьбхбан ляхниъ учвуз заан хъуркьувалар ккун апIурача.
