Украинайин аьтрафариин кIули гъябгъюрайи хусуси метлеб айи дявдин операцияйиъ ихь дирбаш эскрарихъди сабси хайлин ихь ватанагьлийири – медицинайин гъуллугъчйирира чпин пишекарвалин вазифйир заан дережайиъди тамам апIура. Улихьна йигъари Табасаран райондин Ярса гъулан ватанагьли, медицинайин гъуллугънан подполковник Агъакерим Исинов, дирбаш’вал ва заан пишекарвал улупбаз лигну, Суворовдин медаль тувбиинди лишанлу гъапIну. Гьамусяаьт Агъакерим Исиновди ДНР-ин ва ЛНР-ин аьтрафариин зийнар духьнайи эскрариз медицинайин кюмек тувра.

 

 

Къайд дапIну ккундуки, медицинайин пишекар – хирург, дявдин гъуллугънаъ айи Агъакерим Эмирбегович Исиновди сифте Самарайин военыйна-медицинайин институт ккудубкIну, хирургдин пише гъадабгъну. Дугъу Санкт-Петербургдин С.М. Кировдин ччвурнахъ хъайи военныйна медицинайин академия ккудубкIбан кьяляхъ, Урусатдин Оборонайин министерствойин 422-пи военный госпиталиъ кIакIначи хирургди ляхин апIури гъахьну.

Агъакерим Исиновди Волгограддиъ ва Владикавказдиъ госпиталариъ хирургияйин отделенйирин идара апIури гъахьну. Мидланра гъайри, думу Чечен Республикайиъ, Арменияйиъ, Сирияйиъ, Кьибла Осетияйиъ кIули гъушу дявдин гьяракатариъра иштирак гъахьну.

Агъакерим Исинов Суворовдин медаль тувбахъди тебрик апIурача ва багахь гележегдиъ дугъахъди сюгьбат гъабхуз планламиш дапIнача.