Багарихьди Дагъустандиъ «Ватандин гъуллугънаъ айи эскрарин хизанарин комитет» тешкил апIиди. Мидин гьякьнаан улихьна йигъари Дагъустандин Правительствойин председателин заместитель Аьбдурягьман Мягьмудовдин регьберваликкди кIули гъубшу заседаниейиъ мялум гъапIну.

 

Къайд апIуб лазим вуки, му комитет Урусатдин Президент Владимир Путиндин табшуругъниинди тешкил апIурайиб ву.
Дидин асас вазифа – гьюкмин органаринна жямяаьтлугъдин дакьатар сатIи дапIну, хусуси метлеб айи дявдин операцияйиъ иштирак гъахьидариз, шулайидариз ва гьацира дурарин хизанариз кюмек апIувал ву.

Заседание ккебгъри, Аьбддурягьман Мягьмудовди мялум гъапIганси, Украинайин аьтрафариин гъябгъюрайи хусуси метлеб айи дявдин операцияйиз дих дапIну иштирак хьуз жалб гъапIу дагъустанлуйирин саки вари хизанариз кюмек гъапIну.

«Вари Урусатдиъси, Дагъустан Республикайиъра хусуси метлеб айи дявдин операцияйиъ иштирак шулайидарин хизанар гюзчиваликк гъузбан бадали, хайлин уьлчмйир кьабул дапIна. Гележегдиъра думу хизанариз кюмек апIбан бадали гьапIну ккундуш, гъи ухьу къарар адабгъуб чарасуз лазим ву», – къайд гъапIну РД-йин Правительствойин председателин заместители.
Республикайин зегьметнанна яшайишдин артмиш’валин минис-трин заместитель Мягьямедзагьир Кирасхановди уч духьнайидариз, Украинайиъ гъябгъюрайи хусуси метлеб айи дявдин операцияйиъ иштирак гъахьидарин ва шулайидарин хизанариз яшайишдин терефнаан апIурайи кюмекнакан ва гьаму йисаз вуйи планарикан ктибтну. Мицдар хизанариан вуйи касар ляхниъ тIауз, дурариз Дагъустандин гьюкуматдин халкьдин мяишатдин университетдиъ заан образование гъадабгъуз квота тувузра планламиш дапIна.

Мидланра гъайри, дугъу мялум гъапIганси, гьацдар хизанар 2021-пи ва 2022-пи йисар яшамиш шулайи хуларихъан тувну ккуни налогдикканра азад дапIна.