Статистикайин улупбари тасдикь апIурайиси, йислан-йисаз рякъяриъ машинарин аварйир артухъ шула.
Къайд апIувал лазим вуки, рякъярин гьяракатнаъ иштирак шулайи машинарин кьадарра лап гизаф дубхьна. Гьаддиз рякъюнна транспортдин гьяракатнан чIуру дюшюшариъ гизафси тахсиркрар тажруба адру жигьилар вуди шулу. Мидланра савайи, тазади машин хъапIуз дубгъурайи хайлин жигьилари машин хъапIуз ихтият туврайи шагьадтнама фици гъадабгъураш, мялум вухьуз. Улихьна йисари машинар хъауз ихтияр айи дишагьлийирин кьадарра лап цIибди вуйи. Гъи, гъилигиш, гьарсаб шубубпи машиндин рулихъ дуснайидар жигьил дишагьлийир ву.
Гьаму аьгьвалатнаъ арайиз дуфнайи месэлйир гьял апIбан бадали, январин 30-пи йигъан Дагъустандин образованиейин ва илимдин министерствойиъ республикайин аьтрафариин образованиейин ляхин гъабхуз ихтияр айи автошколйирин кIулиъ айидарихъди совещание гъабхьну. Серенжемдиъ кьюд йистIан цIиб тажруба айи, рякъюнна транспортдин гьяракатнан иштиракчйири деетурайи гъалатIарикан ктибтнийи.
«Гъубшу йисан, машин хъапIри кьюд йистIан артухъ тажруба адрударин тахсир вуди, 141 ДТП гъахьну. Эгер думу улупуб 2021-пи йисандин тялукь вахтнахъди тевиш, тахсиркарваларин кьадар 9% за гъабхьну», – къайд гъапIну чан улхбаъ РД-йиъ айи МВД-йин ГИБДД-йин управлениейин кIулиъ айирин заместитель, полицияйин полковник Мурад Уьсмановди.
Полковникди, арайиз дуфнайи аьгьвалат ужуб терефназди илтIибкIбан бадали, автошколйирин кIулиъ айидарикан машин хъапIуз дубгъурайидариз рякъюнна транспортдин гьяракат айи йишварихь артухъди дарсар тувуб ккун гъапIнийи. «Машинар адру рякъюъ машин хъапIри вердиш гъахьидариз федеральный мяна айи рякъюз удучIвган, чпиз тажруба адрувал аьгъю шулу. Гьацира автошколйириан хьадан вахтна деету выпускникариз кьюрдун рякъяриъ читинвалар алахьуру», – гъапну дугъу.
Ав, дугъриданра, гьаци ву. Улихьна йигъари Мягьячгъалайиъ аьхю йифар гъургъиган, рякъяриъ гизаф машинар чиб-чпихъ хъурсбан дюшюшар гъахьнийи. Тажруба адру жигьилар, асас вуди дишагьлийир, машиндин хьадан чархариккди рякъюз удучIвуру.
2023-пи йисан автошколйирин улихь диврайи тIалабар мюгькам ва ижми апIбанди ву.
