Лейтенант Мягьямедов Исрафил Мартинович, мотострелковый баталь-ондин командир, ватандин улихь гъазанмиш гъапIу хъуркьувалариз лигну, 2022-пи йисан Урусатдин Президентдин къарариинди кьюбпи дережайин орден тувбиинди лишанлу гъапIну. Йиз гъийин макьала Исрафилин кьягьялвализ бахш апIураза.
2016-пи йисан Дербент шагьриъ 11-пи нумрайин мектеб ужудар хъуркьувалариинди ккудубкIну, думу Новосибирск шагьриъ Жуковдин заан военный командный училищейик урхуз кучIвру. 2021-пи йисан училище ужудар аьгъювалариинди ккудубкIган, жигьил Балтийский флотдин ригъ алабхъру терефнан сатIиди вуйи 18-пи мотострелковый бригадайин кьушмарин командирди гьаъру. Шубуб вазлилан думу жара батальондин командирди тяйин апIуру.
Хусуси метлеб айи дявдин операция ккебгъу садпи йигъариланмина Исрафил Украинайиъ кIули гъягъюрайи женгариъ иштирак шула.
Исрафилин дада Фатима Эмирбеговна Мягьячгъалайиъ 7629-пи кьушмарин частнаъ медицинайин кюмекнан пунктнаъ медсестради лихури йицIуд йискьан ву. 20-пи июндиъ гвачIнинган Харьковский областдиъ гъягъюрайи гъизгъин женгариъ иштирак шулайи Исрафил Мягьямедовдин дестейиз гъивну ва игит бай уьмриан гъушну, кIуру хабар гъафи вахтна Фатима ляхниан командировкайиз душнайи.
Думу гъагъи герен кIваин апIури, Фатимайи ктибтура:
«Лисундин вахт вуйи… Таниш дару нумрайиан йиз телефондиз зенг гъапIнийи. «Ичв бай Исрафил уьмриан игитси гъушну», – телефондиан гъюрайи сес гъеебхьнийизуз. Хътругъарва, саб дупну лисундин ригъдин нурар мичIал гъахьнийзуз… Саб бицIи вахт-нан арайиъ амрихъ хътруси гъахьиза. Саб дупну, учв Украинайиз гъягъруган йиз бали гъапи гафар кIваин гъахьнийиз: «Дада, уву дердер мапIан, узу Аллагьдин амриинди кьяляхъ гъалибвалиинди гъидиза». Му гафар текрар апIури, узу узуз сабур тувуз хъюгъза.
Кьюб гьяфтайиъ, учуз таниш вуйи вари касар жалб апIури, Исрафил агури гъахьунча. Балин саб шилкьан бихъурадайчуз. Гьамус гьапIру?! Ич хизанар, мирасар вари гъамлу фикрари ккагънайи вахтна йиз телефондиз хъанара таниш дару нумриан зенг гъапIнийи. Фу лигурва – йиз Исрафил! Учв ачмиш гъахьибси, Исрафили, узу флану йи-шваъ аза, дада, дердер мапIан, к1ури, зенг апIуз гьяракат гъапIнийи.
ВуйиштIан, думу, амриан душну, Украинайиъ Балаклея шагьриъ кьушмарин госпиталиъ ади гъахьну. Женгнан яцIаъ дурар хьайи йишвахьинди душмнари тIубкIру сяняьтар йивуру, ва йиз балин контузия шулу, дугъан нервйиризра хайлин чIуру тясир гъапIнийи. Думу сагъ хьайизкьан ккилигунча, хъасин балиин улукьунча. Думу сагъ апIурайи духтрари ктибтнийчуз: «Хасиятнан лап ижми касдихьантIан мициб иццрушин аьх апIуз шлуб дар… Му жигьил командир, дявдин женгнаъ чахъди иштирак гъахьи эскрариз дих апIури, уягъ гъахьну».
Кьюб вазли бай госпиталиъ дахънийи. Хъасин, сарун гьииди вуйиз кIури, хулаз гъафнийи. Хулаъ шубуб гьяфтайиъ гъузну, хъанара кьяляхъ гъягъюз гьялак гъахьи. «Йиз дявдин дустар гъизгъин женгариъ а, хъа узу мушваъ дусназа. Мици хай шулдар, дада», – дупну, чан дявдин рюкзак уч апIуз хъюгъю.
Гьамусяаьт думу мобилизацияйин дахилнаъди Украинайиз жалб гъапIу жигьиларин кьюбпи батальондин командир ву. Гьяфтайиъ саб ражаритIан хай шулдар кIури, телефондиан зенгра тек-биртIан апIурадар. Гьерху вахтна, ужуди вуча, кIуру, хъа дявдиъ ужуди вуйивалихъ хъугъуз шулин? Сарун бай ,Аллагьдиз аманат дапIну, гъитунза. Йигъан хьуб ражарин гъудгниин дюаь апIури, йиз Исрафил ва дугъахъди сабси думу дявдин женгариъ иштирак шулайи вари жигьилар сагъ-саламатди чпин хизанарихьна кьяляхъ гъюз гъит кIури, Аллагьдиз ккарагури шулза», – аьлава гъапIну Фатимайи.
Исрафил Ватандиз вафалу эскер хьувалиъ, гьелбетда, думу тербияламиш гъапIу хизандин эгьемият аьхюб ву. Исрафил чан аьхю абайихь ва бабахь аьхю гъахьну. Дугъан аба, Агъагюлов Эмирбег Хидирович, Дербент шагьриъ ОМВД-йин ва айтIан кьушмарин ветеранарин Советдин председатель ву. Думу 17 йисан Табасаран РОВД-йин начальникдира гъилихну. Исрафили Ватанди чан улихь диву вазифйир намуслувалиинди тамам апIбак Эмирбег абайи туву тербияйин аьхю пай ка. Гъит багъри халкьдин эскервалин ужудар аьдатар давам апIурайи Исрафил Мягьямедов чан абайихьна, хизандихьна сагъ-саламатди ва, чав дадайиз гаф тувганси, гъалибвал гъадабгъну, хъадакри.
