Февралин 1-пи йигъан Хив райондин культурайин хулаъ республикайин «Бабан чIалниинди дагъустандин авторарин эсер варитIан ужуди урхрур» конкурсдин муниципалный этап кIули гъубшну.

 

 

Серенжемдин метлеб – бабан чIалар дургъувал, уьрхювал ва артмиш апIувал, мектебариъ урхурайидарин арайиъ бажаранлу ва зигьимлу бицIидар ашкар, бабан чIалнахьна гьевес ва аьшкь артухъ, литературайинна эстетикайин мумкинвалар артмиш апIуб вуйи.

Республикайиъ му конкурс гъабхури 10 йистIан артухъ ву. Дидиъ Хив райондин табасаран гъулариан 10 мектебдиъ ва лезгйирин гъулариан 4 мектебдиъ урхурайидар иштирак гъахьнийи. Райондин этапдиъ табасаран ва лезги халкьарин шаирарин эсерар варитIан ужуди дурхну, гъалиб гъахьидар республикайин этапдиъ иштирак хьуз Мягьячгъала шагьриз гъягъиди. Гъябгъюрайи йисан конкурсдин рес-публикайин этапдиъ онлайн къайда-йииндира иштирак хьуз ихтияр тувна.

Къайд дапIну ккундуки, конкурсдиъ урхру эсерар мектебдин пландиъ, тематический программйириъ адрудар, яна дарсариъ ктривди, аьлава вуди урхурайи художествойин китабариан духьну ккунду.

Серенжем Хив райондин образованиейин управлениейин бабан чIаларин методический объединенйирин кIулиъ айи Къачмаз Меликовди абццнийи. Дугъу багъри чIал гьарсар касдихьна бабан никкдихъди гъюрайиваликан, бабан чIалнан важиблуваликан, диди уьмриъ уйнамиш апIурайи роликан, бабан чIал гьарсаб миллетдиз варитIан багьалу савкьат вуйиваликан, писателари, шаирари, культурайин деятелари чIал уьбхбак киврайи пайнакан ктибтну ва конкурсдин иштиракчйириз хъуркьувалар ккун гъапIну.

Конкурсдиъ табасаран иштиракчйирин арайиъ Хиварин Манаф Шамхаловдин ччвурнахъ хъайи мектебдин 11-пи классдиъ урхурайи Амина Ремиханова гъалиб гъахьну. Думу шуру Эльмира Аьшурбеговайин «Лизи луфракан кьиса» эсер кIваъланди урхувализ жюрийин вари вакилари заан кьимат тувнийи. Аминайи шиир лап такабурди, хъпехъурайирихьна гьарсаб гафнан мяна рубкьруси, гъавриъ ади ва ачухъ сесниинди гъурхнийи.

Конкурсдин натижйир йивбан кьяляхъ, узу Амина конкурсдихьна гьязур гъапIу, Хиварин мектебдиъ бабан чIалар киврайи мялим Гюлизар Беговайихъди сюгьбат гъубхнийза. Мялимди къайд гъапIгнаси, Аминайи вари поэма кIваъланди гъудубгъну.

«Узу Аминайихьна, поэмайиан гъядягъну, саб кьадарнан паяр тувнийза. Хъа дугъу вари поэма кIваълан гъапIну. Амина гьацир ву, чан улихь диву метлеб бинайиан хъайи-хъайиганси гьял апIрур. Мектебдиъра дугъу ужуди урхура, конкурсариъра кми-кмиди иштирак шула. Гъубшу йисан августдин вазлиъ Дербентдиъ урус чIалниинди «Йиз бицIи ватан» конкурсдиъ сабпи йишв гъадабгъиган, дугъкан учву «Табасарандин нурар» газатдиъ гъибикIнийчва. Муниципальный этапдиъ сабпи йишв гъадабгъбаз лигну, Аминайиз Гьюрматнан кагъаз ва республикайин этапдиъ иштирак хьуз ихтияр тувну. Региондин этапдин регламентдиз 3 дакьикьа улупна. Хъа ич эсер ярхиб ву. Гьаддиз дид’ан саб пай ясана жара эсер гьязур апIуруш, фикир апIурча», – гъапнийи Гюлизар Беговайи.

Республикайин этап февралин 21-22-пи йигъари кIули гъябгъиди. Гьадушваъра ихь Аминайиз хъуркьувалар ккун апIурхьа.

Шиклиъ: Амина Ремиханова, конкурсдиъ шиир урхури.