РФ-дин оборонайин министерствойи гьар йигъан СВО-йин зонайиъ дирбаш’вал улупу ихь эскрарикан мялуматар туври шулу. Гьаму ражари игитвал улупу дирбаш эскрарин арайиъ Сиражудин Мурадялиевдин ччвурра айи.

 

Сиражудин Мурадялиевдиз гьюлин пияда кьушмарин подразделенйирин дестйир хатIасузди гъягъювал тешкил апIбан месэла табшурмиш дапIнайи. Бронетранспортерарин дестейин кIулиъди гъягъюрайи вахтнаъ, Сиражудин Мурадялиевдиз диверсйир ва ахтармишар гъахру миллетчйирин десте чпиз ккеънайиваликан аьгъю гъабхьну. Дидин гьякьнаан дугъу дишлади командириз хабар дебккну.

ЦIиб арайилан миллетчйири ихь эскрарин колоннайиина гюллин цIа уьлюбхну.

Танкариз йивру хилин гранатометдиан гъиву гюлле Сиражудин Мурадялиевдин БТР-ик кубкIну.

Чан кIулиз гуж дубхьну, ибариз ебхьувал кьит гъабхьнушра, Сиражудин Мурадялиевди РФ-дин кьушмарин колонна уьбхюри, душмандин терефназди йивбар давам гъапIну. Колоннайиз гьяракатниинди душмандин гюллин цIиккан ккудучIвуз мумкинвал гъабхьну.

ЦIиб вахтналан Сиражудин Мурадялиев душмандин тереф ужуди рябкъру йишвахьна душну, Урусатдин техника дагъитмиш апIбахьан уьбхюри, Украинайин ургур миллетчи терг гъапIну.

Женгнаъ гьюлин пияда кьушмарин эскриз зиян гъабхьну, хъа гьаци вушра, чав чаз медицинайин кюмек тувну, дугъу женг давам гъапIну. Сиражудин Мурадялиевдин дирбаш’вализ дилигну, колонна вахтниинди лазим вуйи райондиз гъафну.