2020-пи йисан мартдин аьхирариъ ихь уьлкейиз коронавирусдин тIягъюн гъафиган, уьзрихъди аькси женгназ духтрар, медицинайин кьялан пишекрар ва больницйириъ лихурайи вари касар гъудужвнийи. Уьзур чпикра кубчIвбан хатIалувал ашра, медицинайин гъуллугъчйири, гьар йигъан хизандихьна хулазра дяргъюри, медицинайин идарйирин тарагъру уьзрарин отделенйириъ инсанар аьжаликкан ккадагъури, зегьмет гъизигнийи. Фукьан духтрар гьадму уьзриан гъийихнийи.
Урусатди, ДНР-рин ва ЛНР-рин агьалйир нацистарин гьюжмиккан азад апIбан бадали, ккебгъу хусуси метлеб айи дявдин операцияйин садпи йигъариланмина военный гъуллугъчйирихъди сабси медицинайин пишекрарра СВО-йин зонайиз чпин духтирвалин буржи тамам апIуз гъушну. Дагъустандин духтрарра, гьадрарин арайиъди табасаранарра, кьяляхъ гъузундар. Хайлиндарикан учу газатдин машариъ гъибикIнийча.
Гъийин йиз макьалайин игит ‑ духтир-хирург Зиявудин Гьяжимурадович Гьяжиев ву. Думу 1977-пи йисан Табасаран райондин Хючна гъулаъ духтир Гьяжимурад Гьяжиевдин хизандиъ бабкан гъахьну. Байвахтнахъанмина Зиявудин духтрин кеспнахъди таниш вуйи. Гьаддиз мектеб ккудубкIиган, дугъан улихь фунуб вуздик урхуз кучIвруш, суал дийиб-гъну гъабхьундар. Зиявудин Гьяжиев Мягьячгъалайиъ айи Дагъустандин гьюкуматдин медицинайин академияйик урхуз кучIвну, ва дугъу, хъуркьувалиинди думу вуз ккудубкIну, 2000-пи йисхъан мина Республикайин травматологияйин ва ортопедияйин центриъ ляхин апIури гъахьну. Аьхиримжи хьуд йисандин арайиъ думу отделениейин заведующий вуйи.
Ихь уьлкейиъ бегьем дару мобилизация мялум гъапIган, гизаф ватандашари, Урусатдиъ чпин ччвур машгьур гъапIу артистари кIул жин апIуз хъюгъну. Хъа аьдати духтрари, мялимари, машин хъапIрудари армияйиъ гъуллугъ апIурайи ихь ватанагьлийириз, гьюкуматдиз чпихьан удукьру кюмек апIуз чпин разивал тувну.
2022-пи йисан 27-пи октябриъ Зиявудин Гьяжиев чан хушниинди СВО-йин зонайиз ляхин апIуз гъушну. Халис духтрар гизаф гафар апIрудар вуди шулдар. Хъа чпи апIурайи ляхнин тярифар апIуз дурариз затра ккундар. «Буржи тамам апIурача» дупну, гъитру. Буржи кIуру гафнан мяна аьхюб ву. Думу гьарсар касди, чан пишейиз, чан намусназ, чан тербияйиз дилигну, тамам апIуру.
«Узу 3-пи ноябризкьан Донецк Халкьдин Республикайин Донецк шагьриъ госпиталиъ гъилихнийза. Кьюб гьяфтайилан ЛНР-рин Лисичанск шагьрин госпитализ гьаънийзу. Гьелбетда, му госпиталиъ варитIан гизаф игьтияж айи духтрар хирургар ву. Хирургариз бегьемди ляхин а. Госпитализ йигъандин ва йишвандин арайиъ 70-рилан 250-риина жюрбежюр зийнар духьнайи ихь эскрар хури шулу. Урусатдин вари регионариан вуйи духтрарихъди сабси зийнар сагъ апIуз чара абгурача. Лап гъагъи гьялнаъ айидар, сифтейин медицинайин кюмек тувбан кьяляхъ, уьлкейин аьхю шагьрариз гъахура. Суткайин арайиъ гьар хирургди 7-10 операция, 40-риинакьан ПХО (хирургияйин зийниз сабпи дарман йивувал) апIру вахтар шулу. Дупну ккундуки, бязи йигъари кIул за дапIну ил хътабгъуз вахт шулдар. Хъа дявдин чюлиъ айи ихь эскрариз хъана читинди ву, духтрари чпихьан удукьруб вари дапIну ккунду. Эскрарин зийнар гизафси гюлле кубкIбаан, тIубкIру сяняаьт гъутIубкIиган, рукьан тикйир куркIбаан шулу», – ктибтура чаз ккабхъу саб герендин азад вахтна Зиявудин Гьяжиевди.
Операцйир апIури, учв даърахди швнуд-сад йишв вушра, эргну ашра, духтри зийнар духьну дахънайи ихь эскрариз ужудар гафартIан апIудар, дурарин кIвак аьзаб кади гъитудар. Хъа ухьуз аьгъюгъанси, духтрин ужуб гафну аьзарлуйин кIваз рягьят дапIну ккунду. «Эгер духтри гафар апIбан кьяляхъ аьзарлуйиз рягьят дархьиш, думу духтир дар», – гъапну машгьур академик, невролог В. Бехтеревди.
Халис духтир вуйи Зиявудин Гьяжиевдиз багарихьди аьдати ляхнихьна хътакуз, ислягь шартIариъ лихуз кьисмат ибшри.
