Урусатдин Федерацияйин Игит, Кафари флотилияйин 200-пи жаради вуйи мотострелковый бригадайин танкариз аькси идара апIру ракетйирин батареяйин командир, капитан Исрафил Мягьямедов даима вуди кIваин уьрх-баз бахш дапIнайи серенжемар Урусатдин шубуб шагьриъ кIули гъягъиди – Урусатдин Игит мектебдиъ урхури гъахьи Дагъустандин Огнийиъ, Исрафили военный образование гъадабгъу Коломнайиъ ва думу чан хизандихъди саб вахтна яшамиш шули гъахьи Луховицы шагьриъ.
Украинайиъ кIули гъябгъюрайи хусуси метлеб айи дявдин операцияйиъ, уьлкейин дявдин машгьур тарих давам апIури, саб жерге цIийи Игитар арайиз удучIвну. Дурарикан гизафдари, гъуллугънан буржи тамам апIури, чпин жанар фида гъапIну. Дицдар игитарикан сар Дагъ.Огни шагьриъ дуланмиш шули гъахьи ихь ватанагьли, Кафари флотилияйин 200-пи жаради вуйи мотострелковый бригадайин танкариз аькси идара апIру ракетйирин батареяйин командир, капитан Исрафил Мягьямедовра ву. Дугъан игитваликан, Ватандин улихь чан буржи намуслувалиинди тамам апIбакан 2023-пи йисан январиъ чапдиан удубчIву «Табасарандин нурар» газатдин 2-пи нумрайиъ ич хусуси мухбир Умгьанат Сулеймановайин аьхю макьала чап гъапIнийча.
2022-пи йисан октябрин вазлиъ Херсон областдин инсанар яшамиш шулайи Новокаменка кIуру пунктдиъ фронтдин варитIан гъагъи ва жавабдарвалин йишвахь батареяйиз дюзди буйругъар туври, устадвалиинди гъуху кьатI’и гьяракатарин натижайиъ дугъхьан чан эскрарин кюмекниинди кьадар жигьатнаан швнуб-саб ражари артухъ вуйи душмнин гьюжмар дер-ккуз гъабхьну: дурари нацистарин бронетехникайин йицIбариинди аьдадар терг гъапIну. Гьяйифки, душмнин гьамцдар гьюжмарикан сабдиъ Исрафил Мягьямедов игитси уьмриан гъушну, амма батареяйин улихь командованиейи дивнайи вазифйир тамам гъапIну.
Гъуллугънан буржи тамам апIури, улупу жюрэтлувализ ва игитвализ лигну, 2022-пи йисан 14-пи декабриъ Урусатдин Федерацияйин Президентдин Указдиинди Исрафил Мягьямедов йикIбан кьяляхъ «Урусатдин Игит» ччвур тувбиинди лишанлу гъапIну. Исрафил Мягьямедовдин хизандихьна «Гъизилин Хяд» 26-пи декабриъ Мягьячгъалайиъ Кафари флотилияйин командующий, Урусатдин Игит, адмирал Александр Моисеевди ва РД-йин Глава Сергей Меликовди тувнийи.
2023-пи йисан 6-пи февралиъ Дагъ.Огни шагьрин депутатарин собраниейи Исрафил Мягьямедовдин ччвур думу урхури гъахьи Дагъ. Огнийин 4-пи нумрайин СОШ-диз тувуз къарар адабгъну. 23-пи февралиъ мектебдин гьяятдиъ Игитриз ядигар дивбан сережем кIули гъябгъиди. Гьацира гьамусяаьт ихь Игитрикан кинофильм адабгъбан ляхнарра аьхирихъна гъюра.
Урусатдин Игит даимлугъ кIваин уьрхбан гьякьнаан къарар Исрафил Мягьямедовди 2004-пи йисан уьру дип-ломдиинди ккудубкIу Михайловскдин дявдинна артиллерияйин университетдин Коломна шагьриъ айи филиалира кьабул гъапIну. Думу саб кьадар вахтна му университетдиъ мялимдира гъилихнийи. Коломна.ру портали къайд апIурайиганси, Коломна шагьрин округдин яракьлу кьувватарин ветеранари ва Коломнайин артиллерияйин училищейин выпускникари 19-пи июлиъ, Коломнайин курсантдин йигъан, ерли военкоматдин цалик Исрафил Мягьямедов даимлугъ кIваин уьрхбан тахта кебхуз планламиш апIура. Дидин кIалиб гьамусмиди гьязур дапIна.
Гьацира Исрафил Мягьямедов саб тяйин вахтна чан хизандихъди яшамиш шули гъахьи Подмосковьейин Луховицы кIуру шагьриъра думу гьаммишан инсанарин кIваинди гъузруси апIуз планар а.
«Думу кIубан ва жюрэтлу офицер вуйи. Дирбаш’вал – дугъан кьюбпи ччвур ву. Дугъу улупу гьунар хайлин йисари инсанарин юкIвариъ гъубзди», – Исрафил даим вуди кIваин уьрхбакан улхури, къайд гъапIну дугъан аьхюну чве Аьбдул-Малик Мягьямедовди.
