Февралин 6-пи йигъан Москвайиъ вари халкьарин ипIру-убхъру сурсатарин «Продэкспо — 2023» выставка ачмиш гъапIну. Выставкайиъ Урусатдин ва бязи харижи уьлкйирин ипIру-убхъру сурсатарин рынокдин вари циркларин тешкилатар иштирак шула. Аьдат вуйиганси, думу выставкайиъ гизаф уьлкйириъ гьясил апIурайи ичкийин ва чяхирин сурсатарра улупна. Дагъустандин чяхир гьясил апIру «Дербентдин каф али чяхирин завод» ОАО-ра выставкайиз чан гьясил адабгъну.

 

 

«Дербентдин каф али чяхир гьясил апIру завод гьар йисан гьаму выставкайиъ иштирак шула. Выставка, гьам федеральный, гьамсана регионарин алвер апIру циркларихъди аьлакьйир йитIуз мумкинвал тувру ужуб майдан ву. Гьаму йисан учу 18 ччвур тувнайи чяхрар выставкайиз адагъунча. Серенжемдин иштиракчйир ич заводди гьясил апIурайи сурсатариз аьхю маракьлувалиинди лигура. Къайд апIуз ккундузузки, «Урусатдин Федерацияйиъ тIумутIчивал ва чяхир гьясил апIувал артмиш апIбан гьякьнаан» кьабул гъапIу федеральный цIийи къанунди ужуди либхура, табии сурсатарикан гьясил дапIнайи чяхир кьабулди вуйи муштарйирин кьадар артухъ дубхьна. Ич заводдиз тIумтIарин хусуси багълар а, хъа тIумтIар гьясил апIру жара мяишатарихьан масу гъадагъу тIумтIарин сурсатра кади, учу гъубшу 2022-пи йисан 34 агъзур тонна тIумтIар тартиб дапIнача», — ктибтура «ДЗИВ» ОАО-йин генеральный директорин заместитель Гьяйдар Шуайбовди.