Газатдиз нубатнан макьала гьязур апIурза кIури, ноутбук гъадабгъну, рягьят кадиси столихъинди деъза. Интернетдиъ учIвубси, «Дишагьли ва дугъан 7 йисаъ айи риш рякъюъ гъийихну», «Дербент шагьриъ медицинайин тяди кюмекнан машиндин авария гъабхьну», «Рякъюн гъирагъдихъди хулаз гъягъюрайи бицIир машиндикк ккахъну» ва гьацира гьаму жюрейин жара хабрар уларикк ккахьнийиз. Узу Урусатдин МВД-йин пресс-гъуллугънаан тувнайи, цIийи йис улубкьхъанмина уьлкейин рякъяриъ духьнайи хатIалу дюшюшарихъдира таниш гъахьнийза. Гьисабназ гъадагънайи аварйириъ ва рякъяриъ гъахьи хатIалу дюшюшариъ гъийихдарин кьадар гъябкъиган, гучI дархьиди гъубзудар.
Гъубшу 2022-пи йисан Урусатдиъ машинарихъди аьлакьалу вуди рякъяриъ гъахьи хатIалу дюшюшариъ 14 агъзуртIан артухъ инсан гъийихну. Гъябгъюрайи йисан январин сабпи 10 йигъандин арайиъ Урусатдиъ 1700-тIан артухъ аварйир духьна. Думу дюшюшариъ 291 кас гъийихну.
Гьяйифки, ихь республикайиъра му улупбар гъалабулугъвал кипрудар ву. Мисалназ, цIийи йис улубкьу сабпи гьяфтайиъ республикайиъ рякъяринна транспортдин 19 гъагъи дюшюш гъахьну. Натижайиъ шубур кас гъи-йихну, хъа 26 кас, гьадму гьисабнаан сар бицIирра, гъагъи зийнар духьну, больницйириз гъухну.
Къайд апIуб лазим вуки, январин 5-пи йигъан Мягьячгъала шагьриъ улихьнаси Дагъустандин Правительствойин председатель вуди гъахьи Мягьямед Аьбдуллаевра, рякълан улдучIвурайи вахтна, «Нива» машиндикк ккахъну. Дугъан гунгьарин аьфа апIри.
Январь вазлин кьюбпи гьяфтайиъ республикайин рякъяриъ 21 ДТП гьисабназ гъадагънийи. Думу дюшюшариъ кечмиш гъахьи 4 касдилан гъайри, 30-риз жюрбежюр гъагъишнан зийнар гъахьну. Зийнар духьнайидарин арайиъ шубур бицIирра а.
Хъа 16-пи январиан 29-пи январиз (кьюб гьяфтайиъ) Дагъустандиъ гъахьи рякъяринна транспортдин 56 хатIалу дюшюшариъ 11 кас гъийихну, хъа 89 касдиз зийнар гъахьну. Дурарин гьисабнаъ 11 бицIирра а.
Январин аьхириан февралин 5-пи йигъаз республикайиъ 25 ДТП духьна. Думу хатIа-балайин дюшюшариъ сар бицIир ва 4 аьхюдар гъийихну, хъа 31 кас жюрбежюр зийнар духьну боль-ницйириз гъурхну.
Узу ккудушу гьарсаб гьяфтайиъ гъахьи рякъяринна транспортдин аварйир жа-жаради тувбан себеб – учву, гьюрматлу ватандашар, зиихъ тувнайи цифрийириз дикъатлу фикир тувбахьна жалб апIувал вуйиз. Гьяфтайиан гьяфтайиз му гъамлу цифрйир артухъ шула. Ихтиятди гъузай. Машиндин рякъюхъди хъучIукьну душну ккундар. Кьюрдун вахтна рякъяр лап хатIалу гьялнаъ ади шулу. Лазим дару йишвлан рякълан муулдучIванай. Йиф вая миркк али рякъюъ машин сабпну дебккуз шулдар. Машин хъапIрударин фикир гьаммишан дикъатлуди рякъ’ин дубхьну ккунду. Гьаци дархьиш, исихъ тувнайи мисалариз ухшарвал айи дюшюшар артухъ хьиди.
Гьаци, февралин 1-пи йигъан Мягьячгъала шагьриъ Мягьямед-тIагьировдин кючейиъ LADA VESTA автомобиль хъапIрайи, Буйнагъск райондиан вуйи сар жвуву, чан машин дебккуз дархьиди, думу рякъюн гъирагъдихъди гъягъюрайи 11 йисаъ айи бицIи балиин алапIну. Машиндикк ккахъу бай больницайиъ а, машин хъапIрайириина материал уч апIура.
Сабсана дюшюш. Гъябгъюрайи йисан январин аьхириъ Каспийск шагьрин Лениндин ччвурнахъ хъайи кючейиъ гьадму шагьриъ яшамиш шулайи, 26 йисаъ айи жигьил бали, бицIи вахтна гъафил духьну, лазим дару йишвахь рякълан улдучIвурайи 9 йисаъ айи бицIи риш машиндикк ккаъну. Натижайиъ бицIи риш, бедендиз гъагъи зийнар духьну, больницайиъ а, машин хъапIрайириина материал уч дапIна.
