16-пи февралиъ Урусатдин Федерацияйин Игит, Луганскдин Халкьдин Республикайин Игит, ЛНР-ин халкьдин милицияйин армияйин 2-пи корпусдин командующий, ихь ватанагьли, генерал-майор Эседуллагь Абачев Табасаран райондиз хялижв гъахьну. Багьалу хялижв Табасаран район ккебгъру йишв’ин тикмиш дапIнайи стелайихъ райондин кIулиъ айи вакилари кьабул гъапIну.
Райондиз хъуркьбан кьяляхъ, Эседуллагь Абачевдихъди дуфнайидар, райондин глава Мягьямед Къурбанов, администрацияйин ва жямяаьтлугъдин вакилар, мектебдиъ урхурайи баяр-шубар Хючна гъулан Гъалибвалин паркдиз гъушну ва ду-шваъ Ватандин Аьхю дявдиъ гъийихдариз тикмиш дапIнайи ядигарихъ кюкйир дивну.
Табасаран райондин гьюрматлу ватандаш Эседуллагь Абачев кьабул апIуз райондин агьалйир Хючна гъулан культурайин хулаз уч духьнайи. Серенжем муниципалитетдин кIулиъ айи Мягьямед Къурбановди ачмиш гъапIнийи. Дугъу Украинайиъ кIули гъябгъюрайи СВО-йин иштиракчйириз ва дурарин хизанариз кюмек тувбан гьякьнаан Табасаран райондиъ гъабхурайи ляхникан ктибтнийи. Дугъан гафариинди, гьюкмин органарин, депутатарин, райондин идарйирин кIулиъ айидарин, гъуларин главйирин тешкиллувалиинди СВО гъябгъюрайи йишвариз йицIбариинди тоннйирин рягьимлувалин кюмек тувуз мумкинвал гъабхьну. «Кюмекнан гъагъар хьади СВО-йин зонайиз швнуб-сабан гъушунча, эскрарихъди гьарган аьлакьа уьбхюрача. Дугъриданра, дурариз вари гьубкIну а, вушра ихь кюмекну дурарик хъана дирбашди женгар гъахуз рюгь капIру», — къайд гъапIну Мягьямед Къурбановди, ва ихь эскрариз, гъалибвал гъадабгъну, шлубкьан ухди чпин хизанарихьна гъювал ккун гъапIну.
Культурайин хулаъ уч духьнайидарин улихь Эседуллагь Абачев удучIвну гъулхну. «Узу хусуси метлеб айи дявдин операция ккебгъу садпи йигъариланмина дирбаш’вал улупурайи дагъустанлуйириинди, табасаранариинди дамагълу вуза. Мицисдар кьягьял касарихъди ухьу гъалибвал гъадабгъидихьа, думу йигъра учвухъди сабси къайд апIидихьа. Далу терефнаъ юкIв убгрудар хъайиган, женг гъабхуз, душман терг апIуз рягьятди ву. Гьяйифки, эскрар дирихру дявйир шлуб дар. Душмандин терефнаъ гъийихдар швнуб-саб ражари артухъ вуйивали юкIв сикин апIуру. Ихь ватанагьлийирин игитвалар, кьягьялвал, рюгьнан мюгькамвал лап заанди гьисабназ гъадагъна. Узу ичв арайиан вуйивалиин гизаф шад вуза. Жигьилариз гьамциб тербия тувбаз лигну, табасаран халкьдиз, гъалибвал багахь апIбак пай киврайи гьарсар касдиз чухсагъул мялум апIуз ккундузуз», – гъапну Игитри.
РД-йин Халкьдин Собраниейин депутат Алавудин Мирзабалаевди Эседуллагь Абачевдиз райондиз гъюбаз чухсагъул мялум гъапIнийи. Дугъу гъапиганси, Ватан бадали ихь баяри улупурайи гьунарар затра кIваълан гъягъидар. «Медалар, орденар айивализ, адрувализ дилигди, хусуси метлеб айи дявдин опреацияйиъ иштирак гъахьи гьарсар эскер игит ву», – гъапну Алавудин Мирзабалаевди.
Серенжем Хючна гъулан Многпрофильный лицейдин, гимназияйин, 2-пи нумрайин кьялан мектебдин, ТIаттларин кьялан мектебдин ужударсдар ученикари Урусатдин Игитар Эседуллагь Абачевдин ва Рустам Мурадовдин, Руслан Къурбановдин, йикIбан кьяляхъ Урусатдин Игитрин ччвур туву Исрафил Мягьямедовдин уьмрин рякъкан ктибтувалиинди давам гъабхьнийи. Баяр-шубари дявдин темайиан шиърар гъурхнийи.
Игитрихъди гъубху серенжемдиъ Афгъанистандин дявдин ветеранарра, райондин военкоматдин вакиларра удучIвну гъулхнийи. Дурари Табасаран райондиан Афгъандин дявдиъ иштирак гъахьидарин, Украинайиъ гъябгъюрайи СВО-йин иштиракчйирин дирбаш’валикан ктибтнийи. Гюрюшдин аьхириъ Эседуллагь Абачевди райондин культурайин идарайин артистарихъди ватанпервервалин мяълийир гъапIнийи.
Мягьямед Къурбановди генерал-майор Эседуллагь Абачевдиз Табасаран райондин гьюрматлу ватандаш кIуру ччвур тувну ва табасаран халачйирин устадари гъубху халачи багъиш гъапIну.
Учв Табасаран райондиз душнайи йигъан генерал Эседуллагь Абачев райондин главайихъди сатIиди 2022-пи йисан майдин вазлиъ СВО-йиъ гъакIи Мягьямед Аьбдуризаевдин хизандиин улукьуз гъушну, башсагълугъвал мялум апIбалан кьяляхъ, дирбаш бай тербияламиш гъапIу абйир-бабариз аферин гъапну. Мягьямеддин адашдина дадайи – Мягьямедризайи ва Арминейи чпин баликан ктибтнийи. СВО-йиъ игитвал улупбаз лигну, Мягьямед 3 ражари ордендиз улупну гъахьну, амма учв чIивиди имиди думу кьягьялвалин саб ордентIан гъадабгъуз хъуркьундар. Армине Аьбдуризаевайи, чан балин гьюрмат уьбхюри, худлар — Мягьямеддин веледар бадали, тувну ккуни наградйир тувувал ккун гъапIнийи. Эседуллагь Абачевди, гъакIи игитри гъуллугъ апIури гъахьи кьушмарин командованиейихьна илтIикIну, дадайин тIалабнакан ктибтуз гаф тувну.
Ихь адлу ватанагьли, генерал-майор Эседуллагь Абачевдихьан «Табасарандин нурар» газатдин кIулин редкатор Гюлягьмад Маллялиевди гъадабгъу яркьу интервью газатдин гъюру нумрайиъ тувдича.
