Гьаму йигъари, Дербент райондин Билижи поселокдин администрацияйин главади гъилиху Юсуф Аьзизович Аьзизовдин гьюрмат уьбхбаз бахш дапIну, Дагъустандин кьибла терефнан районарин арайиъ волейболиан турнир кIули гъубхну. Думу талитариъ Хив райондин жигьиларин волейболин команда сабпи йишваз лайикьлу гъабхьну.
«Турнириъ 6 командайи иштирак’вал гъапIнийи. Дурар Хив, Дербент, Къурагь ва Ахцигь районарин, Агълаби ва Билижи поселокарин жигьиларин волейболин командйир ву. Ихь командайикан улхуруш, дидин дахилнаъ юкьур бай АрхъитI гъул’ан, кьюр ГъуштIил, сар Яракк, сар Гъвандикк гъулариан ву. Дурарикан сари 7-пи, имбудари 11-пи классариъ урхура. Думу талитариз команда гьязур апIин кIури, райондиан табшуругъ тувиган, саб гьяфтайин арайиъ узу живанар гьязур гъапIунза», – ктибтура райондин жигьиларин командайин тренер Эльнар Гьямзатовди.
Къайд апIуб лазим вуки, учв Эльнар Гьямзатов мектебдиъ урхури имидитIан волейболиин машгъул духьнайир вуйи. Гьамусяаьт дугъу АрхъитI гъулан мектебдиъ физкультурайин дарсар кивра, Хив райондин спортдин мектебдин ва чпин гъулан волейболин командайин тренер ву. Дугъан регьберваликкди АрхъитI гъулан команда саки гьар йисан швнуб-саб ражари республикайин, Дагъустандин кьибла районарин арайиъ вуйи волейболин талитнаъ иштирак шула, ва диди саки гьарсаб талитдиъ пешкешнан йишвар гъазанмиш апIура. Магьа гьаму ражарира гьаци гъабхьну.
«Хив райондиъ волейболиин юкIв али, дид’ан улихь гъягъюз шлу жигьилар гизаф а. Дурарихъди гьаммишан ляхин гъабхурайиш, лап ужу хьибдийи. Дурар сатIиди саб йишв’ина уч апIури, гьязур апIури ккунду. Гьаму месэла цIиб гъагъиб ву. Хъа тупарин, алабхьру палатдин ва талитариъ иштирак хьуз гъягъювалин гьякьнаан учуз кюмек туврайи спонсор а.
Волейбол уйнамиш апIбан артмиш’валикан ва улихь дийигънайи месэлйирикан улхури, пуз ккундузузки, Хив райондиъ вари а: ужуб спорткомплексра, лазим вуйи вари алатарра, пулин дакьатарра. Гьар йисан саб ражари райондин айитI волейболиан гъуларин арайиъ вуйи талитар гъахуру. Хъа гьяйифки, кьибла терефнан районарин команд-йириз ихь райондиз теклиф дапIну, турнирар тешкил апIурадар», – къайд гъапIнийи Эльнар Гьямзатовди.
Тренери ктибтганси, Билижийиъ Хив райондин волейболин команда финалиъ Дербент райондин командайихъди талитназ удубчIвну. Дурарихъди вуйи талит ихь командайиз сацIиб читинуб гъабхьну. Имбуну командйирихь тевиган, Хив райондин волейболин командайин вакилар асланарик гьисаб шуйи.
Талитарин гъалибчйириз гьюрматнан грамотйир, сарихьан сарихьна гъябгъру кубок ва жара пешкешар тувнийи.
