Февралин 20-пи йигъан Хив райондин культурайин хулаъ райондин уьмуми образованиейин идарйирин арайиъ ватанпервервалин цирклиан «Йиз ужагъ – багъри Дагъустан» ччвур тувнайи ачухъ конкурс кIули гъубшну.

 

 

Конкурс Расул Гьямзатовдин 100 йис къайд апIбан ва Мялимдинна тербиячийин йисандин дахилнаъди Хив райондин культурайин, спортдин, жигьиларин политикайин ва туризмдин отделина райондин образованиейин отдели сатIиди тешкил гъапIнийи. Конкурс тешкил апIувалин асас метлеб – аргъаж шулайи наслин ватанпервервалин гьиссар гужал апIувал, дурариз яшлу касарихьна, дявдин ва зегьметнан ветеранарихьна, Ватан уьбхюрайидарихьна гьюрматниинди янашмиш хьуз улупувал ву.

«Гьаму жюрейин серенжемари мектебариъ урхурайидарин арайиъ мяълийир апIбан ва яратмиш’валин устадвал кайидар ашкар апIуз кюмек тувру, инсанариз ватанпервервалин мяъли-йирихъ хъпехъуз, сар-сарин бажаранваларихъди ва тажрубайи-хъди таниш хьуз мумкинвал тувру.

Ватанпервервалин мяълийирин ачухъ конкурс учу райондин мектебариъ урхурайидарин ва жигьиларин арайиъ кIули гъубхнийча. Дидин иштиракчйири мяъли урус ва милли чIалниинди дапIну ккундийи. Жюрийи Ватандин Аьхю дявдин темайиан вуйи ва Расул Гьямзатовдин шиърариан кадагънайи мяълийириз асас фикир туврайи. Вари иштиракчйири мяълийир чIиви сесниинди гъапIну. ИкибаштIан, аьдат вуйиганси, гъалибвалин йишвар гъадагъдар пулин пешкешар багъиш апIбиинди ва дипломариинди лишанлу гъапIну», – ктибтнийи ич сюгьбатнааъ Хив райондин культурайин цирклиз регьбервал туврайи Казбек Къазиевди.

Райондиъ гьаму конкурс гъабхури, сабпи раж дар. Ва шад апIурайиб гьадму вуки, дидин кюмекниинди чпин бажаранвал улупуз ккунидарин кьадар йислан-йисаз артухъ шула. Гъябгъюрайи йисан конкурсдиъ 32 кас иштирак гъахьну. Натижайиъ жюрийи сабпи йишв Мажвгул гъулан мектебдиъ урхурайи Амира Амурлаевайиз тувну. Кьюбпи йишв ЦIудихъ гъулан шуру Луиза Аьшурбеговайи гъадабгъну. Хъа шубубпи йишван сагьиб Ургъа гъулан мектебдиъ урхурайи Расул Гьяжигъурбанов гъахьну.