Мартдин 15-16-пи йигъари Каспийск шагьриъ ерлешмиш дубхьнайи Аьли Аьлиевдин ччвурнахъ хъайи спорткомплексдиъ Дагъустан Республикайин Правительствойин ва гъулан мяишатдинна ипIру-убхъру сурсатарин министерствойин кюмекниинди «Дагъустандин теплицйир» Ассоциацияйина «РостЭкспоТент» выставкйир гъахру центри тешкил дапIнайи гъулан мяишатдин форум кIулиъ гъябгъиди.
Багъбанчивалин, тIумутIчивалин, набататчивалин цирклариъ ишлетмиш апIурайи гьаму деврин тIалабариз жаваб туврайи цIийи саягъар ва гьацира гъулан мяишатдиъ ишлетмиш апIурайи техникйир, алатар ва хайлин жара шей’арра форумдин выставкайиъ улупиди.
«Дагъустандин теплицйир» Ассоциацияйиан тувнайи мялуматариинди, форумдин дахилнаъди республикайин гъулан мяишат артмиш апIбахъди аьлакьалу вуйи жюрбежюр конференцйир, семинарар ва дилаварчивалин гюрюшарра гъахуз планламиш дапIна.
Гъулан мяишатдин «ДагАгро-Каспий» форумдиъ иштирак хьуз ккунидариз варидиз тешкилатчйирин терефнаан теклиф ву.
