Урусатдин регионарикан сарпидарди хутIлариъ хьадукран тумар урзуз хъюгъдар дагъустандин зегьметкешар ву. Цци республикайин 225 агъзур гектарин хутIлариъ хьадукран тумар урзувал планламиш дапIна. Гьадму кьадарнакан 70 агъзур гектар удрин мягьсулариз жара дапIна ва гьаддикан 31 агъзур гектарин хутIлариъ дюгю убзиди кIури, Дагъустандин гъулан мяишатдин ва ипIру-убхъру сурсатарин министерствойин пресс-гъуллугънан кIулиъ айи Мягьямед Аьбдуллаевди «Табасарандин нурар» газатдиз мялум гъапIну.
Дугъу тувну мялуматариинди, гьамусяаьт республикайиъ картфар ва миди вуйи жара мейвйир урзуз гьяракатнинди, хутIлар гьязур апIура.
«Республика гьаму йисан хьадукран вазари хутIлариъ урзру тумарихъди 85% тямин дапIна. Тумар гьудруркIбан дюшюшар гъахьиш кIури, хайлин мяишатари, дурар мусу гъадагъбан бадали, вахт ккимиди жара регионарин мяишатарихъди йикьрар йитIна. хутIлариъ хьадукран ляхнар вахтниинди апIурайивализ лигну, гъийин йигъаз Республикайиъ Къизлар (36 агъзур гектар), Хасавюрт (33 агъзур гектар) ва Тарумовский (16 агъзур гектар) районарин мяишатар улихь хьа. Табасаран ва Хив районар гъадагъиш, Табасаран райондиъ 2025 гектарин хутIлариъ хьадукран тумар урзувал планламиш дапIна. Гьаддикан 570 гектариъ картфар, саки 730 гектариъ жюрбежюр мейвйир, гьадму гьисабнаан 110 гектариъ келем, 121 гектариъ арфанйир, 92 гектариъ памадрар, 123 гектариъ гули, 54 гектариъ кьутI, 23 гектариъ чугъундур, 217 гектариъ миди вуйи мейвйир ва 10 гектариъ бахчайин культурйир урзиди. Аммаки гьелелиг райондин зегьметкешар хутIлариъ тумар урзбан ляхнарихъ хъюгънадар.
Хив райондикан улхуруш, душваъра 2 агъзур гектариъ тумар урзувал планламиш дапIна. Райондин гьавйир манишнахъинди илтIикIну адрувал себеб вуди, гьелелиг хьадукран ляхнар ккергънадар.
Хьадукран вазариъ урзру имбуну культурйирин гьякьнаан кIуруш, цци республикайиъ 19 агъзур гектарин хутIлариъ картфар, 13 агъзуртIан цIиб артухъ гектар хутIлариъ келем, 3 агъзурихьна гектарин хутIлариъ гули, 2 агъзуртIар артухъ гектарин хутIлариъ кьутI ва 1 агъзурин гектарин хутIлариъ чугъундур убзуз планламиш дапIна.
Мидланра гъайри, гьаму йисан сабпи ражари вуди, Дагъустандиъ 250 гектарин хутIлариъ 4 жюрейин сортарин бамбагра убзиди», — гъапну министерствойин пресс-гъуллугънан начальникди.
Къайд апIуб лазим вуки, гъубшу гьяфтайиъ республикайин гъулан мяишатдин ва ипIру-убхъру сурсатарин министр Мухтарбий Аджековдихъди кIули гъубшу пресс-конференцияйиъ дугъу гъапIганси, республикайиъ артмиш шулайи АПК-йин саспи цирклариан Дагъустан Урусатдин регионарикан варитIан кIакIнаъ айи регион ву.
