«Мялимдин пише лап маракьлуб ва гьевеслуб ву. Дици шулу, эгер мялимдиз бицIидар ккундуш, дурарихъан дугъан юкIв убгураш. БицIидарихьна вижнасуз касдихьан халис мялим хьуз шулдар. СумчIур йисан мялимди лихурайи узу урус писатель Лев Толстойдин гафарихъди рази вуза.
Дугъу чан вахтна гъапну: «Эгер мялимдиз чан ляхнихьна ккунивалтIан адарш, думу ужур мялим хьиди. Эгер мялимдиз чахь урхурайирихьна, аба-йинси, бабанси, ккунивалтIан адарш, дицир мялим, вари китабар дурхну, амма я ляхнихьна, я урхурайидарихьна ккунивал адру мялимтIан ужур мялим хьиди. Хъа эгер мялимди чаъ ляхнихьна ва урхурайидарихьна ккунивал сатIи дапIнаш, думу варитIан ужур мялим ву», – къайд гъапIнийи ич гюрюшдиъ Табасаран райондин ЦIийи Лижва гъулан кьялан мектебдин мялим Рягьимат Сеферовайи (шиклиъ). Шаксузди, чакан Рягьимат Мусаевнайиканра, чаъ ляхнихьна ва урхурайидарихьна ккунивал сатIи дапIнайи ва лап ужур мялим ву, пуз шулу. Дици вуйивалин гьякьнаан ич гюрюшдиъ мектебдин директор Мевлют Аьрабовдира гъапнийи.
«Рягьимат Сеферова ич мектебдиз 1989-пи йисан ДГУ-йин Дагъустан филологияйин факультет ккудубкIну гъафнийи. Дидхъан мина дугъу хъуркьувалиинди урус чIалнан ва бабан чIалнан предметариан дарсар кивра. Чан дарсариъ дугъу гъийин деврин цIийивалар ва технологйир ишлетмиш апIура. Месела, мектебдиъ урхурайидарин ццийин урхбан йисандин шубуб четвертдин аьгъюваларин улупбар, гьадму гьисабнаан урус ва бабан чIалариан, ужудар вуйич. Хъа улихьна йисарин натижйирикан улхуруш, аьхиримжи хьуд йисан ич мектеб 15 урхурайири гъизилин медалариз лайикь духьну ккудубкIну. Сачдин йисан гъизилин медалариз 3 урхурайир лайикь гъахьну. Думу хъуркьуваларик Рягьимат Сеферовайинра аьхю пай ка»,
– гъапнийи Мевлют Аьрабовди.
Дугъан хиликк урхурайи бицIидар гьар йисан райондин мектебариъ урхурайидарин арайиъ кIули гъягъру олимпиадйириъ ва жара конкурсариъ иштирак шула. Месела, ццийин урхбан йисан 11-пи классдиъ урхурайи Наргиз Даидовайи урус чIалнаан вуйи райондин олимпиадайиъ сабпи йишв гъазанмиш гъапIну, ккудубшу урхбан йисан 9-пи классдиъ урхурайи Амиля Сеферовайи 2-пи йишв гъадабгънийи. Хъа «ЧIиви классика» конкурсдин райондин дережайиъ дугъахь урхурайири 1-пи йишв, хъа республикайин конкурсдиъ 4-пи йишв гъадагънийи. Бабан чIалнан предметдианра Рягьимат Сеферовайихь урхурайидари гьам райондин, гьамсана республикайин дережайин олимпиадйириъ швнуб-сабан пешкешнан йишвар гъазанмиш гъапIну, хъа Диана Балабеговайи – 1-пи йишв.
Рягьимат Сеферова, мектебдиъ ужур мялимси, хулаъ ужур бабра ву. Дугъу чан жилир Сефер Сеферовдихъди 4 велед тербияламиш гъапIну. Аьхюнур риш Арзуйи Мягьячгъалайиъ ДГУ-йиъ харижи чIаларин факультет ккудубкIну, кьюрпи шуру Алинайи – мединститутдиъ, хъа кьюдюхрар Наиля ва Амиля – ЦIийи Лижва гъулан кьялан мектебдиъ 10-пи классдиъ урхура.
Мялим гьаммишан цIийибтIан цIийиб абгбиин, чан аьгъювалар ва устадвал артмиш апIбиин машгъул духьну ккунду. «Урхурайириз аьгъюваларин саб цIюмгъял тувбан бадали, мялимди сабан чав аквнан саб гьюл хъютIюбкъну ккунду», – гъапну В.А. Сухомлинскийди. Мялимвал жямяаьтлугъдин арайиъ асас пише ву, диди инсандикан аьхю жавабдарвал, вари кьувватар сарф апIувал, аьгь апIувал, устадвал тIалаб апIуру. Ужур баб ва ужур мялим Рягьимат Сеферовара чан пишейихьна гьациб саягъниинди илтIикIну лихурайир ву.
