РД-йин экономикайин ва аьтрафарин артмиш’валин Министерствойин улупбариинди, ихь республикайиъ мялум дапIнайи «150 мектеб» проектдиъ иштирак хьуз республкайин вари районариан уьмуми образованиейин 251 заявка тувнийи. Республикайин бюджетдиан субсидйир гъадагъуз ккунди айидар 47 муниципалин гъурулушдиан вуйи, гьадму гьисабнаан 38 райондиан ва 9 шагьриан.

Гьяракатнаъ айи уьмуми кьялан образованиейин мектебар дибдиан рас апIбан бадали, думу конкурсдиъ иштирак хьуз Табасаран райондианра 12 заявка тувнийи. Заявкйир туву вари мектебар, лазим вуйи баллар гъазанмиш ва тасдикь дапIну, конкурсдиъ гъалиб гъахьну. Магьм думу мектебар: АхьтIарин, Сиртчарин, Бургьанкент гъулан, ТIаттларин, Ярсарин, ТIиварин, Къужникарин, Гелинбатан гъулан, Хянгъарин, Хючнаарин сабпи нумрайин, Хючнаарин кьюбпи нумрайин кьялан мектебар ва ЦО «Юлдаш».

«150 мектеб» проектдин конкурсдин комиссияйин заседаниейин ляхнин натижйириз асас вуди, конкурсдиъ тасдикь гъапIу проектарин кьадар жигьатнаан Табасаран район республикайин районарин арайиъ сабпи йишв’ина удубчIвну.

Дупну ккундуки, «150 мектеб» проектдин метлеб – ихь республикайин мектебарин материалинна техникайин гьял цIийи алапIбан бадали, аьтрафариин али муниципалитетарин жягьтлувалар кьабул ва дурариз кюмек апIувал ву.

Проектдиз асас вуди, республикайин шагьрарин ва районарин ерли самоуправлениейин органарихьан региондин бюджетдиан пулин дакьатар жара апIувал вуди кьюб миллиондихьна манат гъадабгъуз хьиди.