Улихьна йигъари РД-йин образованиейинна илмин министр Ягь’я Бучаевди 2023-пи йисан Дагъустандиъ ЕГЭ ва ОГЭ тувбан гьякьнаан мялуматар тувну. Дугъан гафариинди, цци республикайиъ ЕГЭ 12784 баяр-шубари тувди. Гьадрарикан 11 агъзуркьан цци мектеб ккудубкIурайидар, хъа имбудар мидиз улихьна йисари мектеб ккудубкIдар ву.
«Гьаму йисан республикайиъ, вари муниципалитетар сабишв’инди гьисаб гъапIиган, баяр-шубари 64 пунктдиъ, 980 аудиторйириъ ЕГЭ тувди. Дурар вари лазим вуйи техникайихъдира тямин дапIна.
11-пи класс ккудубкIурайи асас вуди ктагъурайи, ЕГЭ тувру предметарикан 30%-кьан химия, биология ва обществознание ву. Хъасин профильный математика ва тарихнан дарсар ктагъурайидарин кьадар 20%-тIан артухъ ву.
Пуз ккундузузки, мидиз улихьна йисаритIан цци информатикайиан гьюкуматдин саб вуйи имтигьан ктабгъдарин кьадар 150 баяр-шубарин артухъ, хъа, гьяйифки, физикайиан имтигьян туврударин кьадар – цIиб гъабхьну. Янаки, му дарснаан имтигьян туврударин кьадар гьубкIрадар.
Хъа 9-пи классариъ урхурайидарин гьякьнаан кIуруш, цци республикайиъ 41 210 баяр-шубари ОГЭ тувди. Гьаму йисан 9-пи классариъ имтигьян туврайи баяр-шубарин кьадар 6 500-дин артухъ дубхьна. Дурариз 144 пунктариъ 3 агъзур аудиторйир гьязур дапIна», – гъапну министри.
Чан удучIвну улхуб давам апIури, Ягь’я Бучаевди мялум гъапIганси, гьаму йисан урхурайидар имтигьяндиъ лазим шлу вари шей’арихъди тямин апIиди, яна ккудубшу йисанси лазим вуйи материал гьудрубкIувалин дюшюшар арайиз гъидар. Гьелелиг ЕГЭ-йихьна ва ОГЭ-йихьна гьязур хьпан ляхнар пландиинди кIули гъягъюра.
Къайд апIураза, сач Урусатдиин санкцйир иливбан натижайиъ ихь гьюкуматдиъ арайиз гъафи аьгьвалатнахъди аьлакьалу вуди имтигьян туврайидариз гьуркIну, лазим вуйи шей’ар адрувалиан хайлин читинвалар алахьнийи.
Пресс-конференцияйин аьхириъ дидин иштиракчи, ДИРО-йин цифр-йирин трансформацияйин проректор Эскендер Мягьямедовди, ЕГЭ ва ОГЭ кIули гъягъру йигъар тасдикь дапIна кIури, мялум гъапIну. Дугъан гафариинди, сабпи ЕГЭ 26-пи майдилан, хъа ОГЭ 24-пи майдилан ккергъди.
Гьацира дарпиди гъибтуз шулдар, 25-пи апрелиъ республикайин вари муниципалитетариъ выпускникарин абйир-бабарира чпин хушниинди гьюкуматдин саб вуйи имтигьян тувди.
