Гирами Рамазандин вазлин сабпи йигъан Дагъ. Огни шагьриъ Кьибла Дагъустандиъ варитIан аьхю жвумийин гъудган апIру мист ачмиш гъапIну.
Му серенжемдиз гьам ихь республикайиан, гьам Кафари Кавказдин вари регионариан, гьятта Урусатдин шагьрарианра кмиди муфтйир, имамар ва жара хялар уч гъахьнийи. Мажлисназ гъафи гьюрматнан хяларин арайиъ республикайин Халкьдин Собраниейин председатель Заур Аскендеров, Дагъустандин муфтий шейх Аьгьмад Афанди Аьбдуллаев, республикайин милли политикайинна диндин ляхнариз лигру министр Энрик Муслимов, Дагъ. Огни шагьрин глава Жалалудин Аьлирзаев ва жарадар айи .
ЦIийи мист ачмиш апIбан серенжемдин асас пай аьхирихъна гъюбан кьяляхъ, уч духьнайи 15 000 касди сатIиди дибиснайи ушвра мистан гьяятдиъ гьибтнийи.
Шагьрин жвуми гъудган апIру мистан имам Мягьяммед-Рамазан Ражабовди туву мялуматариинди, мист тикмиш апIури 9-10 йискьан вуйи. Думу саб Огни шагьрин агьалйирин кюмекниинди ваъ, хъа вари республикайин агьалйирин садакьайин пулин кюмекниинди тикмиш гъапIуб ву.
«Аьхиримжи йигъари мист ушварин ваз ккебгъайиз ачмиш апIуз кIури кьаст ади, учу суткйириинди лихури гъахьунча гъапишра, кучIал даршул. Багахь хьайи районарин имамарра кIулиъ ади, хайлин жигьилари кюмек гъапIунчуз. Варидиз чухсагъул чпиз. Гьелелиг мистан расвалин ляхнар бегьемди ккудукIнадар. Гьаци вушра, гъудган апIуз инсанар гъюз хъюгъна. Дюзди кIуруш, мист шагьрин гъирагъдихъ хъайивализ лигну, гьелелиг бегьемди абцIрадар. Магьа гьямусяаьт йишвну тяврюгьярин гъудгниз 200-тIан артухъ агьалйир уч шула», — гъапну мистан имамди.
Аьлава апIури хабар туврача, му кьюб мертебайин мистаъ 7 агъзур кас сабишв’инди уршру. Гьяятра кади, мист 20 агъзур квадратдин метрин аьтрафарин ерлешмиш дубхьна.
