Хив райондиъ апрель вазлиъ «Хьадукран уж’вал апIбан гьяфта» акция гъабхуз кка.  Мидин гьякьнаан газатдиз мялуматар райондин культурайин, спортдин, жигьиларин политикайин ва туризмдин отделин кIулиъ айи Казбек Къазиевди  тувну.

 

 

 

Му серенжемдиз, хусуси метлеб айи дявдин операцияйиъ айи эскрарин хизанариз ва агьли касариз кюмек тувбан бадали, волонтерар жалб апIиди.
«Хьадукран уж’вал апIбан гьяфта» акция учу райондиъ сачра гъубхнийча. Дидин метлеб – ялгъузди айи кьабидариз, кюмек адрудариз, СВО-йиъ айи эскрарин хизанариз бистнин ва хулан ляхнариз кюмек апIувал ву. Учу райондин гьарсаб мектебдиз волонтерар уч апIбан ва му акцияйиъ пионерарин тешкилатарра иштирак хьпан табшуругъар тувнача. Акция райондин вари гъулариъ гъябгъиди. Магьа хьадукар улубкьну. Бистнар йирккуз, картфар вая жара мейвйир урзуз кюмек адру, хулаъ марццишин апIуз удудукьрайи касар хайлин а. Учу волонтерарихъди сатIиди дицисдар хизанариз саб гьяфтайин арайиъ, хъа лазим вуш, артухъра кюмек апIурча.

Думу акция гъюру гьяфтайиъ ккебгъди. Гьарсаб хизандиз кюмек тувуз 4-5 волонтер гъягъюру. Баяри бис-тан йибккиди, хъа шубари хулариъ марццишин апIиди. Кюмек ккуни хизанар саки вари гъулариъ а. Учухьна дурубкьнайи сиягьдик кайидариз варидариз кюмек хьибди. Райондин вари гъуларин гьарсаб хизандикан учузра бегьем мялуматар адарчуз. Гьаддиз ватандашарикан ялгъузди айи агьли касар, кюмекназ ккилигурайи хизанарикан учуз хабар дебккуб теклиф апIурача. Хъа кюмек тувуз ккунидарихьан ич акцияйиъ иштирак хьуз шулу», – гъапнийи ич сюгьбатнаъ Казбек Къазиевди.