Аьхиримжи йисари ихь республикайиъ гирами Рамазандин вазлиъ ушв дибиснайи мусурмнарин арайиъ сатIиди ушв гьибтувалин серенжемар гъахувал аьдатнаъ убчIвна. Думу аьдатниин жигьиларра, агьли касарра сабси шад вуйивал серенжемариз уч шулайи инсанарин кьадарну субут апIура.
3-пи апрелиъ Мягьяч-гъалайиъ Иса пайгъамбрин (аь.в.) ччвурнахъ хъайи Духовный центриъ кIули гъубшу Табасаран, Хив районарин агьайлирин ва гьадму районариан шагьрариз кючмиш духьнайи табасаранарин сатIиди ушв гьибтувалин серенжемди 10 агъзуриинакьан инсанар уч гъапIнийи. Дурарин арайиъ имамар, жямяаьтлугъдин ва политикайин вакилар, спортсменар ва аьдати динагьлийир айи.
Серенжем гирами Кьур’андиан вуйи сурйир урхбиинди ккебгънийи. Хъа мажлис кIули гъабхурайи Султан Трамовди Мягьячгъалайин кьялан жвумийин мистан имам МюгьяммадтIагьир Аьгьмадовдиз гаф тувнийи. Дугъу уч духьнайидар гирами Рамазандин вазлихъди тебрик гъапIнийи, гьаму ваз лайикь вуйиганси адапIуз Аллагьдикан вари мусурмнариз кьувват ккун гъапIнийи.
«Гьарсар мусурман кас имбударихьан тафавутлу апIурайи Шагьадайин кьяляхъ улупнайи фарзарикан кьюбпиб йигъандин арайиъ хьуб ражари гъудган апIувал ву. Эгер гъудган апIувал къайдайиъ аш, думу касдин имбу ляхнарра къайдайиъ а. Йислан-йисаз гъудган апIрударин кьадар артухъ шулайивали ухьу шад апIура. Гъудган жямяаьтдихъди мистаъ апIури гъабхьиш, хъанара заан ву. Гирами гьядисариъ дупнайиси, хулаъ сарди гъапIу гъудгантIан жямяаьтдихъди мистаъ гъапIу гъудган 27 ражари заанди дибисна», – гъапнийи МюгьяммадтIагьир Аьгьмадовди.
Табасаранарин ушв гьибтувалин серенжемдиъ Дагъустандин Главайин РД-йин Халкьдин Собраниейиъ айи вакил Нюсрет Уьмаровра иштирак гъахьнийи. Дугъу чан терефнаан серенжем тешкил гъапIдариз чухсагъул мялум гъапIнийи ва мицисдар гюрюшари инсанар сатIи апIурайиваликан гъапнийи.
Серенжем гъабхурайири гаф Дагъустандин Огни ша-гьрин жвумийин мистан имам Мюгьяммад-Рамазан Ражабовдиз тувнийи. Дугъу чан удучIвну улхбаъ абйир-бабарин вазифйирикан гъапнийи. «Гизаф абйир-бабари, чпин веледар бахтлу хьпан бадали, дурариз хулар, машинар масу гъадагъну тувру. Хъа бахт девлетнаъ адар. Абйир-бабарин улихь дийибгънайи варитIан жавабдар месэла – бицIидариз ислам диндиъ улупнайи тербия, ислам диндин аьгъювалар тувувал ву», – къайд гъапIнийи Мюгьяммад-Рамазан Ражабовди.
СатIиди ушв гьибтувалин серенжемдиъ Табасаран ва Хив районарин кIулиъ айи Мягьямед Къурбанов ва Ярмет Ярметовра иштирак гъахьнийи. Дурари уч духьнайи халкь гирами Рамазандин ваз улубкьбахъди тебрик, Аллагьдикан гьаму ваз баркаллувалиинди кIулиз адабгъуз кюмек ккун гъапIнийи. Районарин кIулиъ айидари гьацира, хусуси метлеб айи дявдин операцияйиъ иштирак шулайи эскрар кIваин апIури, дурариз, гъалибвал гъадабгъну, сагъ-саламатди чпин хизанарихьна кьяляхъ гъювал ккун гъапIнийи.
Мягьямед Къурбановди багарихьди Табасаран райондиз Мюгьяммад Пайгъамбрин (с.аь.в.) асарар хувал планламиш дапIнайиваликан гъапнийи. 17-20-пи апрелиъ Хючна гъулаъ кIули гъябгъру выставкайиз 30-ртIан артухъ гирами шей’ар адагъиди. Дурарин арайиъ, Мюгьяммад пайгъамбрин (с.аь.в.) кушарилан савайи, дугъан хусуси шей’ар, хизандиъ ишлетмиш гъапIу бакришнар, ханжал ва жара мутмйир а. Табасаран райондин главайи варидариз выставкайиз гъюз теклиф гъапIнийи.
Иса пайгъамбрин (аь.в.) ччвурнахъ хъайи центриъ гъабхьи серенжем тешкил апIбак асас пай киву Табасаран райондин имам Ансар Рамазановди ва Хив райондин имам Шябан Салигьовдира серенжемдиз уч духьнайидар ушварин вазлихъди тебрик гъапIнийи. Дурари гьамци тешкил апIурайи серенжемариъ иштирак шулайи агьал-йирин кьадар йислан-йисаз артухъ шулайивалиин чпи шад вуйиваликан, сатIиди ушв гьибтували инсанар сатIи апIурайиваликан гъапнийи.
Серенжемдин программа гизаф маракьлуди гьязур дапIнайи. Гьарсар касди гафар апIбан кьяляхъ нашидар урхури, хъа гъудгнин вахт улубкьайиз цIиб вахт ккимиди Мединайиъ ислам дин ккидипуз ккунидарихьан Мюгьяммад пайгъамбрин (с.аь.в.) майит уьбхбакан вуйи сягьнайиан саб пай улупнийи.
Азандин вахт улубкьбан кьяляхъ, тупут ипну, уьмра-гьяждиз сертификатар уйнамиш гъапIнийи. Шубур кас дурарин эйсйир гъахьнийи. Хъа асас пешкеш – автомобиль LADA Granta – Табасаран райондин Гуми гъулан агьалийиз удубчIвнийи.
