Чювккерин Аьбдуллагь Сефербеговдин ччвурнахъ хъайи кьялан мектебдиъ Урусатди кIули гъабхурайи хусуси метлеб айи дявдин операцияйиъ гъакIи Ремик Салигьовдиз бахш дапIнайи гьюрмат уьбхбан тахта кебхувализ бахш вуйи серенжем кIули гъубшну.

 

 

Думу серенжемдиъ МО Чювеккерин гъулан советдин кIулиъ айи Сабир Гьябибов, мектебдин мялимар, урхура-йидар иштирак гъахьнийи.

«Гъи ухьу 2022-пи йисан апрелин 5-пи йигъан, хусуси метлеб айи дявдин операция-йиъ игитси гъакIи ихь гъулажви Ремик Салигьовдин гьюрмат уьбхюри уч духьнахьа. РФ-дин Президент Владимир Путиндин Указдиинди, женгнаъ чан гъуллугънан буржи тамам апIруган дирбаш’вал улупбаз лигну, аьхюну сержант Ремик Салигьовдиз йикIбан кьяляхъ Кьягьялвалин орден тувну.

Гьамцир бай тербияламиш апIбаз Ремик Салигьовдин абйир-бабариз чухсагъул мялум апIураза. Дугъу чан уьмур ихь ислягь яшайиш, саламат гележег бадали тувну. Думу гьаргандиз ихь юкIвариъ гъузди», – гъапну чан удучIвну улхбаъ Сабир Гьябибовди.

Гьюрмат уьбхбан тахта ачмиш апIуз ихтияр дирбаш эскрин адаш Исрафил Салигьовдиз тувнийи.
Пашманвалин серенжемдиъ мялимар удучIвну улхбан кьяляхъ, Чювккерин мектебдиъ урхурайидари женгариъ гъийиху эскрариз бахш дапIнайи шиърар гъурхнийи.