«Культура» милли проектдин дахилнаъди ялхъвнарин «Лезгинка» ансамблиз дарамат тикмиш дапIну ккудубкIна ва думу ишлетмиш апIуз ихтиярра тувна. Дидин гьякьнаан ЦУР-дин (Центр Управления регионом) прямой эфириъ РД-йин культурайин министр Зарема Бутаевайи мялумат тувну. Министрин гафариинди, дарамат ва душваъ айи мутму республикайин хусусиятназ кьабул апIбан ляхнар кIули гъахура.

 

 

«Ихь республика машгьур гъапIу, дюн’яйин миллионариинди инсанарин юкIвар гьяйран гъапIу ансамбль гъийин йигъаз чан хусуси дарамат адарди гъубзнайи. ЦIийиди тикмиш дапIнайи дараматдиъ ялхъвнарин коллективдиз вари шартIар арайиз духна: репетицйир гъахру зал, гимнастикайин ва тренажерарин зал, палтарин цех, сес бикIру студия ва гьацдар жарадар», – гъапну РД-йин культурайин министри. Дугъу къайд гъапIганси, ялхъвнарин хал гьаму йисан ачмиш апIиди.

Къайд апIувал лазим вуки, Дагъустандин «Лезгинка» ансамбль 2023-пи йисан культурайин ва искусствойин цирклиъ Урусатдин Президентдин грантар туврударин сиягьназ гъадабгъна. Дидин гьякьнаан Дагъустан Республикайин Глава Сергей Меликовди Владимир Путиндихъди вуйи аьхиримжи гюрюшдиъ тIалаб гъапIнийи. «Президентди ихь машгьур коллектив грант тувуз лайикь вуйиб гьисаб гъапIну. Думу грант туврударин сиягьназ гъадабгъувал – му ихь артистарин бажаранвал субут апIуб, ихь культурайиз заан кьимат тувувал ву. Ансамблиз Президентдин грант Расул Гьямзатовдиз бахш дапIнайи йисан туврайивали юкIв хъана артухъ шад апIура», – гъапну Сергей Меликовди.