Хюрикк гъулаъ тикмиш апIурайи мектебдин дарамат лап явашди кIули гъябгъюра. Прорабдихьан гьаз мици бушди вучва кIури, гьерхнийза. Дугъу гъапнийи: «Учу бушди дарча, тикилишдин материаларихъди тямин апIувал ужуб дережайиъ адарич. Мисалназ, дараматдин заан этажнан гьацI пайниин бетон улубзхъанмина шубуб вазтIан артухъ вахт вуйич, хъа бетон хури адар. Жара учIру месэлйирра айич».
Райондин главайиз суал: тикилишчйир лазим вуйи материаларихъди тямин дарапIрайивалин себеб фу ву?
Гьяжимягьяммед Гьяжиев, Хюрикк гъул
Главайин жаваб
Хюрикк гъулаъ тикмиш апIурайи мектебдин дараматдин ляхнар кIули гъахурайи кархана республикайин тикилишчивалин министерствойин дахилнаъ айи гьюкуматдин Cаб вуйи заказчикдин ва застройщикдин дирекция ву. Конкурсдин жюрейиинди дурари му ляхнар кIулиъ гъахру подрядчик гъядягъну – ООО «Стройоригинал».
Сач му объектдин ляхнар республикайин бюджетдин дакьатарихъ, республикайин инвестицйирин программайин (РИП) дахилнаъди тамам апIурайи. Дагъустан Республикайин Правительствойин председатель Аьбдулмуслим Аьбдулмуслимов райондиз гъюбан ва дарамат тикмиш апIбан аьгьвалатнахъди таниш хьпан кьяляхъ, яна мектеб аьхюб вуйиб гъябкъиган, проект федеральный программайик кипну, дидин тикилишчивалин ляхнариз федеральный бюджетдиан дакьатар тувруганси, тялукь къарар адабгъну.
Му мектеб 500 баяр-шубариз деъру йишвар ади тикмиш апIурайиб ву. Эвелиан тикилишчивалин ляхнар ккергъу вахтна, вахтниинди материал хъубкьуз кьан апIури гъабхьну, фицики мектебдихьна гъюрайи рякъ аьхю КамАЗ машинар гъягъюз шлу рякъ дайи. Хъа гьаму йисан эвелариъ дина, гъулазди удрубчIври, фуну вахтна вушра аьхю машинар хъауз шлу рякъ гъапIну.
Гьаци вушра, гъубшу гьяфтайиъ бетон гьязур апIурайи кьюр аьхю подрядчикариз узухьна дих дапIну, тикмиш апIурайи мектебдиз вахтниинди материал гъабхбан гьякьнаан йикьрар гъийитIунча. Хъа чпин терефнаан дурари материалихъ гьякъи кьан дарапIди тувуб ккун гъапIнийи.
Гьамцдар аьхю мектебарин объектариъ тикилишчивалин ляхнар кIули гъягъруган, жара дапIнайи дакьатарин асас пай бетондиз гъябгъруб аьгъяди, саспи подрядчикари чпин бетон гьязур апIру бицIи заводар диври шулу. Фицики, дидкан чпизра хайир а, ва жарарин, ккилилигди, ляхинра вахтниинди кIули гъабхуз мумкинвал тувру. Йиз фикриан, гьаму мектебдин подрядчикди чахьна гьамциб аьхю объект гъадабгъайиз, вари месэлйир гьял апIуб чарасуз лазим вуйи.
