РД-йин сагъламвал уьбхбан министр Татьяна Беляевайи ва Роспотребнадзорин РД-йиъ айи идарайин кIулиъ айи Залимхан Уьмариевди «Дагестанская правда» газатдин конференцйир гъахру залиъ кIамкIар уьзрихъди аьлакьалуди республикайиъ арайиз дуфнайи аьгьвалатнакан СМИ-йин журналистариз ктибтну.
Гьар йигъан Дагъустандиъ, гьадму гьисабнаан Мягьячгъалайиъра, кIамкIар уьзриан аьзарлу духьнайидар гьисабназ гъадагъурача. Аьгьвалат гюзчиваликк ккашра, ихтиятвал лазим ву, фицики кIамкIарин инфекция варитIан рягьятди ва ухди тарабгъруб, пневмония, отит, энцефалит уьзрар арайиз хруб ву. Думу уьзрихьан бицIидар уьрхбан бадали, прививка апIувал лазим ву», — гъапнийи Залимхан Уьмариевди.
Татьяна Беляевайи къайд гъапIганси, республикайин сагъламвал уьбхбан министерствойи сикин дарди агьалйирихъди кIамкIарин уьзри инсандин бедендиз, гизафси кIулин маълиз, тувру зарарнакан гъаврикк ккаъбан ляхин гъабхура.
«Ихь метлеб — бицIидар аьзарлу хьуз гъидритувал ву. Бязи абйир-бабари, бицIир аьзарлу ишри, уьмурлуг иммунитет арайиз гъибди,кIури шулу. Хъа уьзур зарар тутрувди улдубчIвруваликан шлиз аьгъя? КIамкIарин уьзри бицIирин сагъламвал ккидипуб мумкин ву»,-гъапнийи РД-йин сагъламвал уьбхбан министерствойин кIулиъ айири.
«КIамкIариан аьзарлу гъахьи сар бицIирикан инфекция гизаф кьадар бицIидарикана тарабгъуз мумкин ву. РД-йин сагъламвал уьбхбан министерствойин, региондин Роспотребнадзорин, РД-йин образованиейин ва илимдин министерствойин, журналистарин кюмекниинди гьеле тIягъюн абхъуз гъитрадар. Амма инфекция тарабгъувалин хатIалувал гъубзра. Гьаддиз ухьу абйир-бабарихъди бицIидариз вакцинайин прививкйир дапIну ккунивалин гъаврикк ккаъбан, кIамкIар уьзур ихь арайиан терг дапIну ккунивалиин ляхин дубхну ккунду», — аьлава гъапIнийи Роспотребнадзорин РД-йиъ айи идарайин кIулиъ айири.
