Республикайин Глава Сергей Меликов 19-пи апрелиъ РД-йин Халкьдин Собраниейиъ багахь йисариз планламиш дапIнайи месэлйирикан улхиди. Улихьна йисариси, гьамусра Послание сабпи нубатнаъди дагъустанлуйирин яшайишдин шартIар за апIбаз бахш дапIнайиб хьибди. Дидин гьякьнаан РД-йин Главайин администрацияйиан мялумат тувра.
Сергей Меликовди ватандашариз, гьадму гьисабнаан хусуси метлеб айи дявдин операцияйин иштиракчйириз ва дурарин хизанариз, яшайишдин кюмек тувбакан, жигьиларин политикайикан, образованиейикан, республикайин промышленностдин кьувват ва туризм артмиш апIбакан удучIвну улхиди.
Серенжем яркьуди гъабхбанди ву. Дагъустандин парламентдин ва Урусатдин Государствойин Думайин депутатарихъди, гьюкмин органарин кIулиъ айидарихъди сабси, РД-йин Главайин Посланиейихъ хъпехъуз СВО-йин иштиракчйириз, дурарин кюлфетариз, сагъламвал уьбхбан, образованиейин, культурайин циркларин лайикьлу гъуллугъчйириз, жигьиларин ва жямяаьтлугъ тешкилатарин вакилариз теклиф дапIна.
