7-пи апрелиъ Дагъустандин Огни шагьрин кьялан больницайин кIулин духтирди 24 йисан военный госпиталариъ эскрарин сагъламвал уьб-хбан цирклиъ хирургди гъилиху, духтирвалин ва идара апIбан ляхнин аьхю тажруба айи пишекар подполковник Гьяжимягьямедов Максим Гьяжимягьямедович тяйин гъапIну.
Къайд дапIну ккундуки, Максим Гьяжимягьямедов Бургьанкент гъулаъ мялимдин хизандиъ бабкан гъахьну. Мектеб ужудар аьгъювалариинди ккудубкIну, думу Самарайин военный медицинайин институтдик урхуз кучIвру ва хирургдин пише гъадабгъуру. Институт ккудубкIбалан кьяляхъ, дугъу хайлин йисари Владикавказдиъ айи военный госпиталариъ хирургияйин отделенйирин идара апIури гъахьну. Аьхиримжи йисари думу Урусатдин оборонайин министерствойин Моздок шагьриъ ерлешиш дубхьнайи 1602-пи нумрайин военный госпиталин начальникди гъилихну.
Максим Гьяжимягьямедов гьацира Кафари Осетия Республикайин лайикьлу духтирра ву.
«Табасарандин нурар» газатдин коллективди Максим Гьяжимягьямедов цIийи гъуллугънаъ тяйин апIувалихъди мубарак апIури, дугъаз жвуван ватандашарин сагъламвалихъди аьлакьалу месэлйир гьял апIбаъ хъуркьувалар ккун апIура.