Апрелин 14-16-пи йигъари Москва шагьриъ спортдин пауэрлифтинг жюрейиан Европайин ачухъ чемпионат кIули гъубшнийи.
Думу талитариъ Хив райондин Хив гъул’ан Зелимхан Пашаевди гъалибвалин сабпи йишв гъазанмиш гъапIну.
Ихь ватанагьли гъи Европайин чемпионвалин хъуркьувалихьна рягьятди гъафну, пуз шулдар. Пауэрлифтингдиъ заан улупбар дугъу сикин дарди спортдиин машгъул вуйивалин ва чан беден артмиш ва кьувватлу апIбан натижайиъ гъазанмиш гъапIну. Думу чав гъадагъу хъуркьувалариин дийи-гънадар. Зелимхан Пашаевди кIваъ жюрбежюр упражненйирин техника дубгъуз ва хъана заан хъуркьувалар гъазанмиш апIуз кьаст а.
«Спортдиин узу 4-пи классдиъ урхурайи йисхъан мина машгъул вуза. Сифте юкьяр дисбан спортдиан аьгъювалар гъадагъури гъахьнийза. Юкьяр дисбан спортдиан узу Дагъустандин чемпионатдиъ сабпи йишв, гьацира жюрбежюр районарин арайиъ вуйи талитариъ хайлин ражари сабпи йишвар гъазанмиш гъапIунза. Пауэрлифтинг узуз хабарсузди кьабул гъабхьунзуз. Узу спортдин думу жюрейиан тренерра адарди, сарди, интернетдин кюмекниинди аьгъювалар гъадагъуз хъюгъюнза. Дюзди кIурза, му жюрейин талитариъ иштирак шули юкьубпи ражтIан дариз. Вари юкьби талитариъра сабпи йишвар гъазанмиш гъапIунза», – ктибтура Зелимханди ич сюгьбатнаъ.
Дугъриданра, интернетдин кюмекниинди шубуд йисан пауэрлифтингдиан аьгъювалар гъадагъну, ихь жигьил сабпи ражари гъубшу йисан ноябрин вазлиъ вари Урусатдин чемпионатдиъ иштирак гъахьнийи ва гъалибвал гъазанмиш гъапIнийи.
Кьюбпи турнир – Дагъустандин чемпионат 11-пи мартдиъ Мягьячгъалайиъ кIули гъубшнийи. Гьаду-шваъра Зелимханди варитIан заан натижйир улупну. Сакьюдар йигъарилан, яна 19-пи мартдиъ, думу вари Урусатдин профсоюзарин Ачухъ кубокдин талитариъ иштирак хьуз Москвайиз гъушнийи. ИкибаштIан, гьадушваъра ихь спортсмен сарпир гъахьну. Юкьубпи талит – Европайин чемпионат вуйи.
«Пауэрлифтингдиан Европайин чемпионатдиъ Ирандиан, Азербайжандиан, Беларусдиан, Казахстандиан, Сербияйиан ва гьацира жара 9 уьлкейиан 1200 спортсмен иштирак гъахьнийи. Узу думу талитариъ 4 медаль гъазанмиш гъапIунза. Хъа йирфариин дахъну гъагъ за апIру талитариъ вари дюн’яйин рекорд дивузра мумкинвал гъабхьунзуз. Узу 185 килограмм гъагъ за гъапIунза. Йиз яш 22 йис вуйиз. Му яшариъ айидарин арайиъ гьаму гъагъ за апIуз гъабхьи живан спортсмен гьелелиг адар. Турнир шубуд йигъан кIули гъубшнийи. Дюзди кIурза, тренер адарди узу гьаму натижйирихъ хъуркьувалиин хайлиндар мюгьтал духьнайи. Ав, му спортдин гъагъи жюре ву. Тренер чарасуз ади ккунду. Му спортдиъ аьхю гъагъ за апIруган, гьаммишан хатIалу ва сабпну зиян апIру дюшюшар шулу. Гьаддиз ихтиятвал уьбхюри ккунду.
Европайин чемпионатдин кьяляхъ узуз жюрбежюр тренерарихьан, командйирихьан чпихьна гъюбан теклифар гъюз хъюгъюнзуз. Европайин чемпионатдиъра иштирак хьуз теклиф варидариз тувруб дар. Думу, спортсмендин хъуркьувалариз ва улупурайи натижйириз лигну, тувра. Хъа гьелелиг йиз багъри гъул’ан гъягъюз планарик ктариз. Узу Хив гъулан спортзалиъ талитарихьна гьязур. Гьяйифки, спортдин алатар йирси духьна. Хъа вушра, спортдиин машгъул вуйи касдиз думу манигъ’вал дар», – гъапнийи спортсменди.
Зелимхандиз гьаму йисан пауэрлифтингдиан кIули гъябгъру вари дюн’яйин чемпионатдиъ иштирак хьуз путевка тувна. Думу чемпионат фуну уьлкейиъ ва фуну вазлиъ кIули гъябгъюруш, гьеле мялум дапIнадар. Мисалназ, гъубшу йисан думу чемпионат декабрин вазлиъ гъабхьнийи. Хъа гьамусяаьт Зелимхан пауэрлифтингдиан июнь-июль вазариъ Кафари Кавказдин кубок бадали вуйи ва Ставрополиъ кIули гъябгъру Европайин кубокдин талитарихьна гьязур шула. Гьадушвариъра чемпион духьну кьяляхъ гъафиган, думу райондиъ шадвалиинди къаршуламиш апIиди кIури, умуд кивдихьа.
