Расул Гьямзатовдин ччвурнахъ хъайи жямяаьтлугъ фонднан вице-президент, РД-йин Жямяаьтлугъ палатайин миллетарин ва динарин арайиъ мясляаьт артмиш апIбан комиссияйин председатель, табасаранарин аьда-тарикан вуйи китабарин автор ва жямяаьтлугъ кас Аьзизова Гьябибат Нажмудиновна кечмиш духьну, йис гъубшну.
Му вядайиз тялукь вуди, 19-пи апрелиъ Табасаранарин милли культурайин автономияйи Мягьячгъалайиъ Р. Гьямзатовдин ччвурнахъ хъайи милли библиотекайиъ Гьябибат Азизовайин гирами рюгьназ бахш вуйи вечер кIули гъубхну. Вечериз дугъахъди ляхин гъапIу жямяаьтлугъ касар, дугъан майил-аьдатар, гьюкуматдин жюрбежюр идарйирин вакилар, мялимар ва урхурайидар уч гъахьну. Гьадму гьисабнаан серенжемдиъ Табасаран райондин администрацияйин ва АхьитI гъулан, милли политикайин ва динарин ляхнариз лигру министерствойин, РД-йин Жямяаьтлугъ палатайин, Дербент шагьрин депутатарин корпусдин вакиларра гъафнийи.
Серенжемдиъ Гьябибат Аьзизовайин ужудар дустарра – Дагъустандин дишагьлийирин союздин председатель Интизар Мамутаева, Р.Гьямзатовдин ччвур али гимийин командир Султан Карибов, Р. Гьямзатовдин ччвурнахъ хъайи фонднан директор Мягьямед Гьяйдарбегов ва жарадар айи.
УдучIвну гъулхдарин гафариинди, Гьябибат Аьзизовайин аьхю абйир Табасаран райондин АхьитI гъул’ан ву, хъа дурарин адашдизна дадайиз Гьябибат ва сарсан риш – Сурия ва бай Исамудин, чпин хизан Дербентдиъ яшамиш шулайиган гъахьну. Гьябибат Аьзизовайи заан аьгъювалариинди Дагълу шубарин мектеб, Дербентдин педучилище ва ДГПУ ккудукIну. Думу Табасаран райондин Жвулли гъулан бализ швуваз гъушну, ва дурарин жигьил хизан Мягьячгъалайиъ яшамиш шули гъабхьну.
Хъасин думу чан уьмрин юлдшихъди дюн’яйилан илдицну, гъапишра, гъалатI даршул. Дурарин хизан гизаф йисари Монголияйиъ гьюкуматдин ляхнарихь гъабхьну. Пенсияйиз удучIвбахъан, Аьзизоварин кюлфет Дагъустандиз кьяляхъ гъафну, ва Гьябибат Нажмудиновна гизаф натижалуди жямяаьтлугъ ляхнариин лихуз хъюгъну, ва дугъу халкьдин гъуллугънаъ аьхю хъуркьувалар улупну. Думу варжтIан артухъ ихь гьюкуматдин, жямяаьтлугъ ва гьюкуматарин арайиъ вуйи наградйирин сагьиб ву.
Вечериъ арайиз адагъу метлеблу фикрариз асас духьну, гъапиш, Гьябибат Нажмудиновнайин ччвур Дербент шагьрин ва Табасаран райондин кючйириз тувуз, гьацира дугъан ччвурнахъ ужудар хъуркьувалар улупу жямяаьтлугъ касариз йисан-йисан тувру мясляаьтнан премия тешкил апIуз чалишмиш хьувалин месэла дивну.
