Гьаму йигъари Нугъай райондин Кунбатар гъулаъ айи «Лашын» КФХ-йин 50 гектарин хутIлариъ 13 жюрейин бамбаг убзуз хъюгъна. Бамбаг убзбан ляхнар ккергъу йигъан му мяишатдиз, Дагъустан Республикайин Правительствойин председатель Аьбдулмуслим Аьбдулмуслимовра, республикайин гъулан мяишатдин министр Мухтарбий Аджековра кIулиъ ади, меркездиан делегация гъубшну.

 

 

Къайд апIуб лазим вуки, цци республикайин 250 гектарин хутIлариъ, инвесторарра жалб дапIну, бамбаг убзуз планламиш дапIна. Хъа Нугъай райондиъ бамбаг убзувалин асас фикир учв республикайин гъулан мяишатдин ва ипIру-убхъру сурсатарин министрди лихурайи вахтнахъанмина Аьбдулмуслим Аьбдулмуслимовдинуб вуйи, ва дугъу му культура ихь региондиъ артмиш апIуз кюмек апIбан гафра тувнийи. Хъа магьа гъи, райондиъ му ляхин кIулиз адабгъуз хъюгъна.

Гьаддихъанмина жюрбежюр экспертизйириинди ихь региондиъ гьясил апIуз шлу, янаки ухьухь айи гьавайин шартIариз хас вуйи бамбгин штилар гьязур апIуз удукьну, ва «Лашын» КФХ-йин кIулиъ айи Мурзадин Къарамурзаевди, бамбгин бегьерра Урусатдин имбуну регионариътIан швнуб-саб ражари артухъди хьибди кIури, умуд кивра.

Мялум вуйиганси, бамбгикан пекдин вая жара жюрейин жюрбежюр парчйир, мурслар, кIаж вая жара шей’ар гьязур апIуз шулу. Хъа дидин жмыхдикан мал-къарайиз ккабхьруб апIура. Мидланра гъайри, му культурайин тумарикан ччим, сябун, глицерин ва жара сурсатар апIуз шулу.

Му КФХ Нугъай райондиъ гъулан мяишатдин сурсатар гьясил апIурайи аьхю мяишатарикан саб ву. Мушваъ мал-къара уьбхюра, гъулан мяишатдин жюрбежюр культурйир битмиш апIура. Мисал вуди гъадабгъиш, гьаму йигъари, бамбгихъди сабси, мяишатдин 150 гектарин хутIлариъ гулира убзура. Гьаддикан 60 гектарин хутIлиъ убзурайиб лизи жюрейин гули ву. Натижайиъ мяишатдин вакилари хьадан аьхириъ 320 тонна гулдин бегьер гъадабгъуз планламиш апIура.