Дербент шагьур, имбу вари чан лишнарииндиси, кючйирин аьнтIикьавалииндира тафавутлу ву. Мисалназ, жара шагьрариъ кючйир, саб-сабдихъди тархьну, цIар-цIарди ерлешмиш духьнаш, мушваъ дициб аьгьвалат адар. Асас вуди шагьрин тарихи терефнаъ кючйирин гъембергъалайин гъавриъ духьну ккудубкIуз шулдар. ВуйиштIан, кюгьне вахтари му кючйир кьастнаан гьаци диври гъахьидар ву.

 

 

Гъюниъ гъюн йивну дийигънай хуларин
Кьюб жергейин арайигъ гъярсна кючйир.
Мушвягъ гъючIвган дестйир гъаних душмнарин,
Хуларкан шули гъахьну эскрар-авчйир.

Дугъриданра, шагьриин алархьу душмнар му кючйиригъ улдугури, хулариан апIру гьюжмикк ккахьри гъахьну. Аммаки кюгьне вахтари шагьриз ужударси гьисаб апIури гъахьи саспи шартIарикан гъи читинвал арайиз дуфна: шагьриъ учIвру-удучIвру рякъяр лап цIиб ву. Дурар кьибла терефнаъ федеральный трассайихьинди гъюрайи Сальмандин ччвурнахъ хъайи кючейиинди, хъа кафари терефнаъ – Гагариндин ччвурнахъ хъайи кючейиинди ккудукIура. Му аьгьвалатнаан удучIвуз шагьрин жавабдар идарйири рякъяр агури гизаф вахт ву. Иллагьки думукьан машинар адру Дербентдиъ са-сабган ярхи гъярсувалар арайиз гъюруган.

Аьхирки му месэла гьял апIбахьна саб кьадар гамар алдагъна. Шагьрин кафари терефнаъ гьюлин гъирагъдихъди гьачIабккнайи Хандадаш Тагъиевдин ччвурнахъ хъайи кючейиан федеральный трассайихьинди удучIвру гъяд иливура ва, думу давам апIури, шубуб километрин ярхишин айи рякъ ккивра. Дурарихъди сабси газ гъабхру турб-йир, лазим вуйи йишварихьан токран симар зигури, гьадму ляхинра кIули гъябгъюра. Му ляхнар «Мостотряд – 99» кIуру подряддин идарайиз ихтибар дапIна.

Рякъ ккиврайи участокдин начальник Иншаллагь Селимовдин гафариинди, гьамусяаьт ляхнар «Электросигнал» заводдин багарихь кIули гъягъюра. Шагьрин агьалйирра айи рякъяриз кюмек вуйи цIийи рякъ ухди ккудубкIбаз ккилигура. Фицики туристар гъюру фасил башламиш шули, гъюру-гъяру машинариз кючйир гьудруркIру вахт ккебгъру.